ABŞ-ın yeni seçilmiş prezidenti Donald Trampın andiçmə mərasiminə iki gün qalıb. O, 2025-ci il yanvarın 20-də vəzifəsinin icrasına başlayacaq.
Modern.az xəbər verir ki, xarici KİV-lər Donald Trampın andiçmə mərasiminin formatına görə xüsusi olacağını qeyd edirlər.
Tramp Kapitolidə and içəcək və inauqurasiya nitqi ilə çıxış edəcək. Amma məhz bu mühafizəkar və ənənəvi tədbir ABŞ prezidentlərinin digər inauqurasiyalarından fərqlənəcək.
Donald Tramp ABŞ tarixində fasilədən sonra vəzifəsinə qayıdan ikinci prezident olacaq. Ondan əvvəl bunu yalnız Qrover Klivlend 19-cu əsrdə bacarmışdı. Bununla belə, Tramp həm də yaşı ilə seçilir - vəzifəyə başlayanda 79 yaşı olacaq və bu, onu Amerikanın ən yaşlı prezidentinə çevirəcək.
O, həm də cinayət keçmişi olan ilk seçilmiş prezident olub: Trampın həbsi cəmi bir neçə saat çəksə də, artıq tarixə düşüb. Əvvəllər prezidentlər yalnız seçildikdən sonra ittihamlarla üzləşirdilər.
Trampın andiçmə mərasiminin tarixdə ən çox izlənilən tədbir olacağı gözlənilir. Mərasimi dünyada təxminən 150 milyon insanın izləyəcəyi gözlənilir.
Mərasimin yayımı Bakı vaxtı ilə saat 21:00-da başlayacaq.
Mərasim qeyri-adi şəraitdə baş tutacaq: bayraqlar tədbirdən bir qədər əvvəl vəfat etmiş keçmiş prezident Cimmi Karterin xatirəsinə yarıya qədər endiriləcək. Bu faktın Trampı qıcıqlandıracağı barədə şayiələr yayılsa da, ənənəyə əməl olunur – matəm 30 gün davam edir.
Tramp həmçinin müəyyən edilmiş bir neçə adəti dəyişmək qərarına gəlib. Məsələn, ilk dəfə olaraq inauqurasiyaya xarici liderlər dəvət olunub. Təsdiq edilmiş qonaqlar arasında Viktor Orban, Georgia Meloni, Nayib Bukele və Xavyer Miley var.
Trampa qarşı sui-qəsd cəhdindən sonra təşkilatçıları narahat edən əsas məsələ təhlükəsizlik olacaq. Tədbiri Milli Qvardiyanın, polisin və xüsusi təyinatlıların 8 mindən çox əməkdaşı qoruyacaq. Təhlükəsizliyə 120 milyon dollardan çox vəsait ayrılıb və bu, tarixin ən qorunan andiçmə mərasimlərindən biri olacaq.
Mərasimdən sonra Donald Tramp Oval kabinetə gedəcək və burada onu yeni səlahiyyət müddətinin ilk addımları gözləyir: sərt immiqrasiya qanunlarının imzalanması, iqtisadi islahatlar və əvvəlki administrasiyanın sərəncamlarına yenidən baxılması.
Donald Trampın gündəmində ən çox müzakirə edilən məsələlərdən biri də onun ABŞ ərazilərinin genişləndirilməsi ilə bağlı açıqlamaları olub. Seçki kampaniyası zamanı o, Kanada, Panama kanalı və Qrenlandiyanın Amerika yurisdiksiyasına birləşdirilməsinin mümkünlüyünü dəfələrlə qeyd edib. Bu bəyanatlar həm ölkə daxilində, həm də xaricdə qəzəbli reaksiyaya səbəb olub, lakin Tramp təkid edir ki, bu cür addımlar ABŞ-ın iqtisadi və geosiyasi mövqeyini gücləndirəcək.
Bundan əlavə, yeni prezident hər iki tərəf üçün “tez və ədalətli həll” təklif etməyə hazır olduğunu bildirərək, Ukraynadakı münaqişəyə son qoyacağını vəd edib. Bu planların xüsusiyyətləri naməlum olaraq qalır, lakin ekspertlər artıq yeni administrasiyanın genişmiqyaslı diplomatik təşəbbüslərə başlaya biləcəyini düşünürlər.
A.Qorxmaz
