Hazırda Rusiya-Ukrayna müharibəsi davam edir. Buna baxmayaraq, Rusiya Cənubi Qafqazda da təsir imkanlarını saxlamağa çalışır. Lakin region ölkələri bunda heç də maraqlı deyil. Məsələn qonşu Gürcüstanın əraziləri Rusiyanın nəzarətindədir. Eləcə də Ermənistan Rusiya ilə birlikdə olmaq əvəzinə Avropaya inteqrasiya etmək istəyir. Azərbaycan isə həm xarici, həm də daxili siyasətində müstəqil davranmağa üstünlük verir.
Görünür hər üç ölkəni də birləşdirən bir ortaq cəhət var.
Maraqlıdır ki, Ermənistanla sülh müqaviləsi imzalandıqdan sonra Cənubi Qafqaz Birliyi yaranacaqmı?
Məsələ ilə bağlı Modern.az-a danışan Milli Məclisin Beynəlxalq münasibətlər və parlamentlərarası əlaqələr komitəsinin üzvü Elçin Mirzəbəyli bildirib ki, Qafqaz evi ideyası yeni deyil:
"Tarixinin müxtəlif dövrlərində belə bir ideya olub. Zaqafqazya Federasiyanın bir zmanalar bolşevik ideyasına uyğun mövcud olduğunu bilirik. İndiki vaxtda belə bir birliyin yaradılmasına ehtiyac varmı? Təbii ki, bu, prinsip etibarilə sual doğurur. Çünki Azərbaycanın inteqrasiya meyilləri bəllidir. Bizim üçün hədəf türk evidir. Bu da əsaslı ideoloji platforması olan birlik modelidir. Eyni zamanda türk dövlətləri arasında çağdaş əlaqələri, Azərbaycanın buradakı aktiv rolunu, qardaş Türkiyənin töhfələrini nəzərə alsaq, prinsip etibarilə həm cazibədarlığı, həm də resurs və potensialı baxımından Türk evi, Türk Birliyi indiki şəraitdə daha məqsədəuyğun görünür. Dövlətlərimizin strateji hədəflərindən biri də budur. Cənab Prezident inaqurasiya mərasimində bu barədə xalqın, millətin ideoloji hədəflərini işarə vermişdi".
Deputat vurğulayıb ki, fərqli xalqların, milli kodlara malik xalqların ayrı-ayrı təsisatları yaratması, birlikdə hərəkət etməsi, yaxud indiki halda Avropa modelində birləşmə ehtimalı var:
"Amma yaxın 10 il ərzində Ermənistanın nə Cənubi Qafqazda cərəyan edən proseslərə, nə də daha geniş miqyasda təsisatlara inteqrasiya edəcəyini gözləyirəm. Gürcüstanın da indiki halda strateji hədəfləri bəlli deyil. Gürcüstan dost dövlətdir. Azərbaycan və Türkiyə ilə enerji layihələrinin iştirakçısıdır. Amma fikrimcə, bu ölkənin ideoloji platforması bəlli deyil. Ermənistan isə bölgədə xarici maraqların təmsilçisi kimi çıxış edir. Yaxın vaxtda Ermənistanın qütblərarası manevr siyasətindən əl çəkəcəyni gözləmirəm.Ermənistanın bəli, ideoloji platforması var. Amma bu platforma xalqlar və dövlət birliyinə yönəlməyib. Əksinə erməni faşizminə, ultra milliyyətçiliyə söykənir. Bu dünya görüşü, Ermənistandan və dünya erməniliyinin təfəkküründən silinmədikcə, bu ölkənin bizimlə hansısa birlik modelində təmsil olunmasına inanmıram".
