Ötən ilin sonunda Azərbaycana məxsus “Embraer 190” tipli sərnişin təyyarəsi Rusiya Federasiyasının hava məkanında kənar fiziki və texniki müdaxiləyə məruz qalaraq idarəetməni itirmiş vəziyyətdə Qazaxıstan Aktau şəhəri istiqamətinə yönləndirilib. İnsan tələfatı və xəsarət alanlar olmasına baxmayaraq, pilotların, bələdçilərin yüksək peşəkarlığı, şücaəti və cəsurluğu sayəsində təyyarə qəza enişi həyata keçirib. Təyyarədə olan 67 nəfərdən 38-i həlak olub, 29-u sağ qalıb.
İlkin araşdırmalar nəticəsində məlum olub ki, Azərbaycan təyyarəsi Çeçenistanın hava məkanında olan zaman Rusiyanın hava hücumundan müdafiə vasitələri tərəfindən vurulub, hava gəmisi idarəetməni itirib. Təyyarənin füzelyajında zenit raket kompleksindən atılan raketin qəlpələrinin izləri qeydə alınıb.
Hazırda Qazaxıstan hadisə ilə əlaqədar istintaq aparılır və yekun nəticələrin tezliklə açıqlanacağı bildirilib.
Aktau yaxınlığında baş verən təyyarə qəzasından sonra faciə ilə əlaqədar saxta informasiyalar yayılıb.
Rəsmi qurumlar qeyd edib ki, heç bir reallığı əks etdirməyən bu saxta məlumatlar mərkəzləşdirilmiş qaydada Azərbaycanın informasiya mühitinə müdaxilə xarakteri daşıyan dezinformasiya kampaniyasının tərkib hissəsidir.
Saxta informasiyaların mənbəyi Rusiyanın mətbuat orqanları, Moskvaya yaxın teleqram kanallarıdır.
Bir neçə gün əvvəl Rusiya Federasiyasının Azərbaycandakı fövqəladə və səlahiyyətli səfiri Mixail Yevdokimov Xarici İşlər Nazirliyinə dəvət olunub.Görüş zamanı, Rusiya mətbuatında, eləcə də Rusiyanın bəzi rəsmi dairələri tərəfindən dezinformasiya xarakterli, ölkəmizi hədəf alan yazıların dərc olunması, reportajların yayımlanmasının anlaşılmazlıq yaratdığı, bunun Azərbaycan Respublikası və Rusiya Federasiyası arasında Müttəfiqlik qarşılıqlı fəaliyyəti haqqında Bəyannamənin məzmun və ruhuna zidd olduğu diqqətə çatdırılıb.
“Azərbaycan Hava Yollarına” məxsus təyyarənin faciəvi şəkildə qəzaya uğraması ilə bağlı ilkin təhqiqatın nəticələrinin məlum olduğu, istintaqın yekunlaşdırılması üçün iş aparıldığı, qəza ilə bağlı Rusiya tərəfindən gözləntilərimizin açıq şəkildə bəyan edildiyi xatırlanıb.
Rusiyanın Azərbaycana qarşı təxribat xarakterli informasiyalar yaymasının arxasında duran səbəblər nələrdir?
Məsələ ilə bağlı Modern.az-a danışan Azərbaycan-Rusiya Parlamentlərarası İşçi Qrupunun üzvü Elşad Musayev bildirib ki, Rusiya Azərbaycana qarşı qaba davranarsa, ona sərt mövqe göstəriləcək:
“Azərbaycan təyyarəsi Rusiya ərazisində vurulub. Müxtəlif versiyalar səsləndirilir. Mənim versiyama, əldə olunan məlumatlara görə, təyyarə qəsdən vurulub. Ona heç bir don geydirmək olmaz. Hadisədən sona Rusiya-Azərbaycana münasibətləri kəskinləşməyə başladı. Cənab Prezident qətiyyətlə Rusiya rəhbərliyinin üzr istəməli olduğunu bildirdi. Təbii ki, Azərbaycan mətbuatı məsələni araşdırmağa başladı. Rusiyaya qarşı münasibətlər xeyli kəskinləşdi. Bu da Rusiyanı narahat edir. Ona görə də, səfirimiz Rusiya xarici işlər naziri Qaluzin tərəfindən qəbul olunub. Təbii ki, Rusiya mediasında da, sosial şəbəkələrində də Azərbaycana və onun rəhbərliyinə qarşı çox xoşagəlməz ifadələr işlənir. Bununla bağlı biz etiraz edirik. Onların da səfiri bizim XİN-ə çağırılıb. "Qara qutu" da tapılıb. Biz bu məsələnin qanunvericiliyə uyğun araşdırılıb, açılamasını istəyirik. Amma bir şeyi nəzərə almaq lazımdır ki, Rusiya böyük, qaba, imperiya siyasəti yeridən dövlətdir. Bunlar nisbətən balaca dövlətlərin onlarla dirəşə bilməsinə öyrəşməyiblər. Biz bütövlükdə qonşu dövlətlərlə münasibətlərin yaxşı olmasını istəyirik. Amma Azərbaycana qarşı belə qaba rəftar olacaqsa, ona qarşı sərt mövqe olacaq. Bizim mövqe haqlı və düzgündür".
Deputat vurğulayıb ki, Rusiyanın addımı beynəlxalq hüquqa ziddir: "Sərt formada biz Rusiyanın bu məsələlərdə haqsız olduqlarını aşkara çıxarırıq, səhv olduqlarını üzlərinə deyirik. Biz bunun beynəlxalq hüquqa da zidd olduğunu açıq bəyan edir, müttəfiqliyə, dostluğa, qonşuluğa yaraşmayan hərəkət kimi qiymətləndiririk".
