Ermənistanın Baş naziri Nikol Paşinyan Ağ Evdə ABŞ-nin vitse-prezidenti Ceyms Devid Venslə görüşüb.
Görüş zamanı tərəflər Cənubi Qafqazdakı vəziyyəti, eləcə də İrəvanla Vaşinqton arasında münasibətləri müzakirə ediblər.
Maraqlıdır, Paşinyan Vaşinqton görüşündə nəsə əldə edə bildimi? Görüşdən gözləntilər nələrdir?
Görüşlə bağlı Modern.az-a danışan politoloq Elxan Şahinoğlu bildirib ki, Nikol Paşinyan ABŞ-da dini bir konfransa qatılsa da, Vaşinqtonda rəsmilərlə görüşməyə can atıb:
"Çünki, o ancaq konfransda iştirak edib geri qayıtsaydı, bu onun okeanın o tayına mənasız səfəri kimi qiymətləndiriləcək və buna görə müxalifət onu tənqid edəcəkdi. Buna görə də Paşinyan çox çalışıb ki, Vaşinqtonda rəsmilər və konqresmenlərlə görüşsün. Konqresmenlər arasında o ilk növbədə ermənipərəst Frnek Pallone ilə görüşüb. Aydındır ki, ABŞ Prezidenti Donald Tramp Nikol Paşinyanla görüşməyəcəkdi. Belə olan halda ABŞ-ın vitse-prezidenti Ceyms Vens onu qəbul edib. Ancaq görüşün uzun çəkdiyini söyləmək mümkün deyil".
Politoloq vurğulayıb ki, Nikol Paşinyan Bayden administrasiyası ilə olduğu kimi Tramp administrasiyası ilə sıx əməkdaşlığa ümid edir:
"Ermənistanın xarici işlər naziri Ararat Mirzoyan keçmiş dövlət katibi Entoni Blinkenlə strateji tərəfdaşlıq haqqında sazişə imza atmışdı. Paşinyan ümid edir ki, yeni admisitrasiya da bu sazişə sadiq qalacaq. Paşinyan təhlükəsizlik sahəsində Vaşinqtondan dəstək gözləyir. Trampın ətrafında bir neçə ermənpərəst var. Onlar Trampa məsələhət görə bilərlər ki, ABŞ Ermənistana siyasi, iqtisadi və hərbi dəstəyini davam etdirsin. Trampın buna marağı olacağını zənn etmirəm. Tramp ticarətçidir, ölkəsinə qazanc gətirən dövlətlərlə əməkdaşlıq etmək istəyir. Ermənistana pul xərcləmək isə Trampın baxışlarına ziddir. Ona görə də Paşinyanın Vaşinqtondakı görüşlərdən real nəticə əldə edəcəyini söyləmək mümkün deyil".
