Ukrayna Prezidenti Volodimir Zelenski sabah Türkiyəyə səfər edəcək. O, Ankarada türkiyəli həmkarı Rəcəb Tayyib Ərdoğanla görüşəcək.
Səfər zamanı Ukraynadakı vəziyyəti müzakirə edəcəklər. İki liderin əməkdaşlığın və ikitərəfli əlaqələrin yaxşılaşdırılması yollarını, Ukraynada baş verən son hadisələri, regional və qlobal məsələləri müzakirə edəcəkləri bildirilir. Tərəflərin iki ölkə arasında əməkdaşlığın gücləndirilməsi üçün atılacaq addımları da müəyyən edəcəyi gözlənilir.
Zelenskinin Türkiyəyə səfəri Rusiya Federasiyası və ABŞ-ın rəsmi nümayəndə heyətləri arasında çərşənbə axşamı Səudiyyə Ərəbistanında keçirilməsi planlaşdırılan danışıqlara təsadüf edir. Rusiya prezidentinin mətbuat katibi Dmitri Peskov bildirib ki, görüş Rusiya-Amerika münasibətlərinin bərpasına, Ukrayna münaqişəsi üzrə mümkün danışıqların hazırlanmasına, Rusiya və ABŞ prezidentləri Vladimir Putin və Donald Tramp arasında görüşün təşkilinə həsr olunacaq.
Rusiyanı görüşdə xarici işlər naziri Sergey Lavrov və Rusiya prezidentinin beynəlxalq məsələlər üzrə köməkçisi Yuri Uşakov təmsil edəcək. Amerika tərəfinə dövlət katibi Marko Rubio, ABŞ-ın milli təhlükəsizlik üzrə müşaviri Mayk Uolz və ABŞ prezidentinin Yaxın Şərq üzrə xüsusi nümayəndəsi Stiv Vitkoffun daxil olacağı gözlənilir.
Gözlənilən görüşlə bağlı Modern.az-a danışan türkiyəli hərbi ekspert, general Yücel Karauz bildirib ki, Zelenskinin müharibə dövründə inamını boşa çıxartmayan tək lider Türkiyə və Prezident Rəcəb Tayyib Ərdoğan olub:
“Zelenski bir vaxtlar ABŞ-a, başda Makron və Britaniya, eləcə də Almaniya olmaqla Avropaya çox inanırdı. ABŞ onun inamını boşa çıxardı, Avropa İttifaqı da onu yarı yolda qoymaq üzrədir. Zelenskinin başqa döyəcəyi qapı yoxdur. Dolayısı ilə Zelenski Səudiyyə Ərəbistanında baş tutacaq Tramp-Putin görüşündən öncə öz düşüncələrini həm Trampa, həm də Putinə çatdıracaq, masada əlini gücləndirəcək tələbləri ilə əlaqədar Türkiyə Prezidenti Rəcəb Tayyib Ərdoğanla məlumat mübadiləsi etmək və koordinasiya qurmaq üçün Türkiyəyə gəlir. Rusiya ilə Ukrayna arasındakı müharibə istər davam etsin, istərsə də sülhlə nəticələnsin fərq etməz. Ortaq maraqlarımız olan Qara dənizlə daşınması, Ukraynanın resurslarının Qara dəniz üzərindən keçirilməsi və Ukraynanın yenidən qurulması kimi məsələlər görüşün əsas temalarıdır. Dolayısı ilə Türkiyədən gözləntisi həm ABŞ, həm də Rusiya üzərinə görüşlərini, tələblərini ayrı-ayrı çatdırmasını gözləyir. Rusiyaya ayrı, ABŞ-a ayrı tələblərini çatdırmasını, bazarlıq pozisiyasını dəyərləndirməyə çalışır. Təbii ki, bu, bir az gec oldu. Son atəşkəsə, sülhə gedən yolda son çapalamalardır. Torpaq və müharibədən meydana gələn problemlərin danışılıb, həll ediləcəyi dövrdə Zelenski son bur manüvr etmək istəyir. Lakin bu görüş Zelenskinin istək və arzularını-NATO və Avropa İttifaqı üzvlüyü və limitsiz hərbi yardımların artıq olmayacağını anladı. Təbii belə olan halda rusların işğal etdiyi ərazilərdən başqa qalan digər regionlarını qorumağa çalışacaq”.
Hərbi ekspert qeyd edib ki, Zelenski qəti olaraq uduzub:
“Sabah da görüşün əsas məğzi açıqlandıqda təbii ki, bundan qazanclı və ya itirənlər olacaq. Zelenski qəti olaraq uduzdu. Rusiya uduzarkən qazandı. ABŞ qazandı. Avropa isə qazanarkən uduzdu. Belə olan halda Türkiyə əvvəldən olduğu kimi Ukraynanın ərazi bütövlüyü və hüquq çərçivəsində Rusiya ilə Ukrayna arasında bitərəf siyasətini davam etdirdi. Bu bitərəf siyasətin nəticəsi olaraq bu gün iki tərəfin də sözünə güvənə biləcəyi və dialoq qura biləcəyi ölkə pozisiyasında olub. Sabahkı görüş bunun məntiqi nəticəsidir”.
