Avropa dövlətləri bəyan ediblər ki, Ukraynanın təhlükəsizliyini təmin etmək məqsədilə Kiyevə ordu yollamağa hazırdılar. Qeyd edək ki, Ukraynaya ordu göndərmək fikrinə Türkiyə də müsbət yanaşır.

Məsələ ilə bağlı Modern.az-a danışan hərbi ekspert Elxan Şıxaliyev bildirib ki, yalnız atəşkəsdən sonra Ukraynaya sülhməramlıların göndərilməsi mümkündür:

"İndi Rusiya-Ukrayna müharibəsinin dayandırılması istiqamətində müzakirələr gedir. Ukrayna post-müharibə dövründə öz təhlükəsizliyinə zəmanət istəyir. Ukrayna ilk növbədə istəyir ki, NATO-ya daxil edilsin. Lakin ABŞ bunun baş tutmayacağına dair açıq mesajlar verdi. Belə olan halda atəşkəsin imzalanmasından sonrakı mərhələdə müharibənin yenidən aktiv fazaya keçməsi üçün Ukraynanı dəstəkləyə biləcək ölkələrin silahlı qüvvələri yerləşdirilməlidr. Rusiya tərəfi deyir ki, Ukrayna danışıqlar nəticəsində neytrallığını qoruyacaqsa, NATO-ya daxil olmamaq öhdəliyini götürəcəksə, məsələ müzakirə oluna bilər. Görünən odur ki, ABŞ masada hələ ki Rusiyanın istəklərini dəstəkyir. Ukrayna ərazilərinin bir hissəsi de-fakto Rusiyanın nəzarətində qalmalıdır. Digər hissəsi isə ABŞ və Avropa ölkələri tərəfindən milli sərvətlərin maliyyə vəsaitlərinə çevrilməsi təşkil olunmalıdır. Ukraynanın əraziləri və milli sərvətlərinin bölüşdürülməsi gedir". 

Ekspert vurğulayıb ki, Avropa İttifaqı ölkələri Ukraynanı dəstəkləməkdə, ora silahlı qüvvələr yeritməkdə qərarlı görünür:

"Əslində Avropa İttifaqı Ukraynanın nəzarətində qalan ərazini özünün təhlükəsizliyi üçün bufer zona kimi görür. Müzakirələr gedir. Əgər ABŞ, Çin, Türkiyə, Almaniya və Fransa Ukraynanın təhlükəsizlik zəmanətini əsaslandıra bilsələr, atəşkəsdən sonra müharibə dayanacaqsa, ora hansı qüvvələrin yeridilməsi o qədər də müzakirə mövzusu olmayacaq".