“Rusiya-Ukrayna müharibəsinin yenidən alovlanmayacağına zəmanət yoxdur”
“Bu gün sürətlə dəyişən dünyada qlobal sabitlik yaxın aylarda, hətta illərdə əldə edilməyəcək”, - Azərbaycan Prezidenti İlham Əliyev “Euronews”a açıqlamasında belə deyib.
Cümə axşamı Azərbaycan paytaxtında keçirilən Qlobal Bakı Forumunda "hazırda qlobal transformasiyalar" adlandırdığı məsələyə toxunan Əliyev bildirib ki, dünya "yeni qayda və nizamlama mexanizminin işlənib hazırlanması mərhələsinə" daxil olub.
"Görünür, köhnə dünya nizamı artıq aradan qalxıb. Beləliklə, beynəlxalq birliyin qarşılıqlı fəaliyyətinin yeni konfiqurasiyası necə olacaq, bunu heç kim bilmir. Müxtəlif fikirlər var".
“Lakin tamamilə aydın olan odur ki, hər bir ölkə öz imkanlarına daha çox diqqət yetirməlidir, heç bir yardıma və hətta beynəlxalq hüquqa arxalanmamalıdır”, - deyə Azərbaycan lideri deyib.
İlham Əliyev bildirib ki, o, əsas dünya aktorlarının böyük münaqişələrin həlli yollarını tapmaq imkanları ilə bağlı “optimist yox, realist ” olmağa üstünlük verir, xüsusən də söhbət Rusiya-Ukraynadakı müharibəsindən gedirsə.
“Müharibə dayansa belə, onun yenidən alovlanmayacağına zəmanət yoxdur”, - deyə Azərbaycan lideri qeyd edib.
“Bizim 30 ilə yaxın vaxtımız oldu. Azərbaycanla Ermənistan arasında 1994-cü ilin yazında əldə edilmiş atəşkəs sazişi var idi, lakin bu, müharibənin başa çatması demək deyildi. Sadəcə müharibə transformasiyaya uğramışdı. Müharibə isə yalnız sülh müqaviləsi imzalandıqdan sonra başa çatır”, - Əliyev deyib.
Prezident qeyd edib ki, Cənubi Qafqaz regionu onilliklər ərzində “qarşıdurma və düşmənçilik” meydanı olub. Bu gün regionu ətrafımızda baş verən istənilən böhrandan qorumaq vacibdir.
"İndi nisbətən sakit dövrə keçid etmişik, ona görə də diqqətimizi buna cəmləməli, əhatəli olacaq təhlükəsizlik mexanizmləri qurmalı, gələcək hərbi qarşıdurma təhlükəsini aradan qaldırmalı və Sovet İttifaqı dövründə mövcud olmuş (mehriban) qonşu kimi yaşamağa çalışmalıyıq”.
Azərbaycan 1991-ci ilin oktyabrında müstəqilliyini elan edərkən regionun digər ölkələri ilə birlikdə SSRİ-nin 15 sosialist respublikasından biri idi. Əliyev müstəqil olmamağın region ölkələrindən heç birinin öz gələcəyini planlaşdıra bilməməsi demək olduğunu etiraf etsə də, respublikaların “aktiv qarşılıqlı fəaliyyəti” davam etdirdiyini vurğulayıb.
Rəsmi Bakının qonşu Ermənistanla münasibətlərinin hazırkı vəziyyətindən danışan Azərbaycan prezidenti deyib ki, “bugünkü vəziyyətin böyük üstünlüyü” ondadır ki, son beş il sakit keçib.
Bununla belə, sabitlik yalnız razılaşma yolu ilə əldə edilir, deyə o, qeyd edib.
İlham Əliyev “Sülh sazişi imzalanmayana qədər burada (regionda) sabitlik olmayacaq”, - deyə fikrini yekunlaşdırıb.
Elbəyi Həsənli. Sürix
