Azərbaycan və Ermənistan tərəfi uzun müddətdir müzakirə olunan sülh sazişi layihəsininin bütün 17 maddəsinin nəhayət razılaşdırıldığını bəyan edəndən bir neçə gün sonra iki ölkə arasındakı şərti sərhəddə atəşkəs pozuldu.
Son günlər Azərbaycan Ordusunun mövqeləri Ermənistan tərəfindən mütəmadi olaraq atıcı silahlardan atəşə tutulur.
Ən sonuncu dəfə martın 19-u saat 19:00-dan 19:10-dək Ermənistan silahlı qüvvələrinin bölmələri Keşişkənd rayonunun Arpa yaşayış məntəqəsi istiqamətində yerləşən mövqelərindən Azərbaycan Ordusunun mövqelərini atıcı silahlardan atəşə tutub.
Modern.az-a açıqlamasında Milli Məclisin deputatı Elman Nəsirov bildirib ki, Ermənistanın ali siyasi, hərbi rəhbərliyi həmişəki kimi yenə də ikibaşlı oynayır:
"Ermənistan ali siyasi rəhbərliyi yenə də sülhdən danışır, hətta sülh müqaviləsində açıq qalmış iki bəndlə də razılaşdığını bildirir. Və bəyan edir ki, sülh sazişinin imzalanması üçün heç bir maneə qalmayıb, bütün bəndlər razılaşdırılıb. Bir yandan Paşinyan ATƏT-in Minsk qrupunun buraxılması məsələsinə də toxunur və buna müsbət yanaşır. Hətta Azərbaycana qarşı ərazi iddialarını konstitusiyadan çıxarmaq üçün referendum keçirilməsi məsələsi ilə bağlı da mövqe bildirir. Digər yandan Paşinyan, Zəngəzur dəhlizi ilə bağlı məsələdə bir addım belə geri çəkilmək istəmir. Və hətta hökumətin qapalı iclasında bildirir ki, Zəngəzur dəhlizi məsələsində Azərbaycan israrlıdır, belə getsə, yenidən müharibə başlaya bilər. Bax, bu tezisdən çıxış edərək Ermənistanın baş naziri Azərbaycanla sərhəddə atəşkəsi pozur və onu dəstəkləyən dövlətlərə mesaj göndərir ki, guya atəşkəsi Azərbaycan pozub. Ermənistan Azərbaycanın artıq Üçüncü Qarabağ müharibəsinə başlamaq təhlükəsinin olduğunu çatdırmaqla, onlara göstərilən dəstəyin artırılmasını istəyir".
Parlamentar vurğulayıb ki, gələn il Ermənistanda seçkilər olacaq, buna görə də Paşinyan kompromissiz siyasətçi imici formalaşdırmaq istəyir:
"Son vaxtlar Ermənistan Fransadan daha çox silah almağa başlayıb. Hətta ABŞ-nin Almaniyadakı bazasında olan silahların bir hissəsinin də Ermənistana göndəriləcəyi barədə məlumatlar yayılmaqdadır. Ermənistan əməlli-başlı silahlanır. Bu silahlar yəqin ki, sərgiyə qoyulmaq üçün deyil. Ermənistan onun da fərqindədir ki, Azərbaycan çox güclü dövlətdir. 2020-ci ildə əldə etdiyimiz tarixi zəfərdən bu yana Azərbaycan Ordusu daha da güclənib, qüvvətlənib. Bu ordu ilə üz-üzə gəlmək Ermənistan üçün faciə ola bilər. Ermənistan baş naziri əslində, ölkədəki revanşizm dalğasının da fərqindədir. Yazın gəlişi ilə yenidən Ermənistan küçələrinə insanların axışması baş tuta və istefa tələbləri arta bilər. Ona görə də Paşinyan atəşkəsi pozur, silah-sursat alır və kompromissiz siyasətçi fonu yaratmaq istəyir. Çünki onu xəyanətdə ittiham edirlər. O da belə avantüralara imza atmaqla əslində dediyim kimi, güzəştsiz siyasətçi fonu yaratmaq istəyir. Həm də gələn il Ermənistanda parlament seçkilərinin olacağını da nəzərə almaq lazımdır. Bu reallığın da Paşinyanın davranışına təsirini hesablamamaq mümkün deyil. Ordunun ona tabe olmayıb özbaşına belə avantüralara getməsinə gəldikdə, hesab edirəm ki, bunun ciddi əsasları yoxdur. Orduda bütün vəzifəli şəxslər Paşinyana yaxın adamlardır. Ona görə də bu versiya aktual deyil".
