Ermənistanın baş naziri Azərbaycanla sülh müqaviləsi bağlamaq istədiyini az qala hər saniyə bəyan edir. Hətta bir az da qabağa gedərək özünü dünyaya sülh göyərçini kimi sırıyır, müqavilə bağlamaq üçün topun Azərbaycanda olduğunu deyir.
Amma Ermənistanın konstitusiyasında Azərbaycana qarşı ərazi iddiası aradan qaldırılmır.
Yəni nə sülh...
Atatürk Cümhuriyyət Xalq Partiyasını (CHP) yaratdı, ardından Türkiyə Cümhuriyyətini qurdu.
İndi Atatürkün yaratdığı partiya az qala Türkiyə Cümhuriyyətini dağıtmaq üçün çarpışır.
Yəni nə Türkiyə Cümhuriyyəti...
Amerika Birləşmiş Ştatları dünyada özünü demokratiyanın beşiyi, insan hüquqlarının müdafiəçisi kimi təqdim etdi, bunu praktiki göstərdi də...
İndi bu ölkənin prezidenti Tramp qılıncını alıb əlinə, qabağına keçəni kəsib tökür. Ukraynada, Fələstində, Suriyada, Afrikada, hər yerdə pulu, haqsızlığı müdafiə edir. Minlərlə belə misal var.
Yəni nə demokratiya, nə insan hüquqları, haqları...
Hər şey, hər yer paradoksdur. Bunu texnoloji inkişafmı doğdu, koronavirusmu dünyaya gətirdi, yoxsa dünya əzəldən elə beləymiş, biz görməmişik... bilmirəm.
Görünən odur ki, hər şey klassik mənasını itirib.
Hətta insanlar daha gözlərinə deyil, qulaqlarına inanırlar.
Paşinyan sülh sazişi bağırır, əsgərləri hər gün Azərbaycanı atəşə tutur.
Türkiyə insanı CHP AK Partiya məsələsinə öz müqəddəratı, Türkiyənin müqəddəratı kimi baxır, CHP ilə AK Partiya hakimiyyət üçün Türkiyəni xərcləyir.
Dünya Trampa yeni xilaskarı kimi baxır, Tramp isə Ukraynanı işğal edən Rusiyaya tərəf çıxır.
Yəni Paşinyanın istədiyi sülh əslində müharibədir.
CHP və AK Partiyanın istədiyi Türkiyə deyil, hakimiyyətdir.
Trampın istədiyi qan üzərində varlanmaqdır.
Bunlar hamısı açıq görünür.
Buna inanmaq üçün qulağa ehtiyac yoxdur.
İnsan da, dünya da gözünə inansa.
