Ermənistan parlamenti Avropa İttifaqına (Aİ) üzvlük prosesinin başlanması ilə bağlı referendum layihəsini tam şəkildə qəbul etsə də, bu prosesin arxasında real niyyət yoxdur.
Modern.az-ın məlumatına görə, Ermənistanın “Hraparak” qəzeti hökumət daxilindəki mənbələrə istinadən yazıb ki, rəsmi İrəvan bu ideyanı daha çox Rusiyanı şantaj etmək üçün istifadə edir.
Qeyd olunur ki, Ermənistan hakimiyyəti Avropaya inteqrasiya məsələsini siyasi təzyiq vasitəsinə çevirmək niyyətindədir. Onlar Avropa yönümlü referendum təşəbbüsünün 60 min vətəndaş tərəfindən dəstəklənməsinə baxmayaraq, bu məsələdə aktiv addım atmaq fikrində deyillər. Bunun əvəzində, Kremlə referendumun sadəcə ictimai təşəbbüs olduğunu və hökumətin ona ciddi yanaşmadığını göstərməyə çalışırlar. Beləliklə, Ermənistan rəhbərliyi Moskva ilə münasibətlərdə əlavə güzəştlər əldə etməyə cəhd edir.
Eyni zamanda, Aİ-yə inteqrasiya prosesini əlaqələndirmək üçün baş nazirin müavini postunun yaradılacağı ilə bağlı iddialar səslənir, ancaq hökumət daxilində bu barədə heç bir konkret müzakirənin aparılmadığı bildirilir.
Bu isə bir daha göstərir ki, Ermənistanın Aİ-yə üzvlük planları real siyasi strategiyadan çox, Moskvanı təzyiq altında saxlamağa hesablanmış bir gedişdir.
Son illərdə Ermənistanın xarici siyasətində bu cür manipulyativ yanaşmalar artıq bir tendensiyaya çevrilib. Rəsmi İrəvan gah Rusiyanı, gah da Qərbi bir-birinə qarşı istifadə edərək siyasi və iqtisadi dividentlər qazanmağa çalışır. Lakin Ermənistanın real güc balansında Aİ-yə inteqrasiyasının mümkün olmadığı və Moskvanın bölgədə əsas dominant güc olaraq qaldığı aydındır. Belə olan halda, Paşinyanın “Avropaya gedirik” mesajı daha çox daxili auditoriyanı sakitləşdirmək və Rusiya Prezidenti Putinə qarşı şantaj elementinə çevrilmiş görünür.
Bütün bunlar onu göstərir ki, Ermənistan rəhbərliyi Aİ-yə üzvlük ideyasını sadəcə alver predmeti kimi istifadə edir. Lakin bu taktika nə Avropada, nə də Rusiyada ciddi qəbul edilir. Brüssel İrəvanın geosiyasi şantaj oyunlarını aydın görür və real üzvlük perspektivlərinin olmadığını anlayır. Moskva isə Paşinyanın bu cəhdlərinə qarşı ciddi tədbirlər görməyə çalışır. Ermənistanın siyasi oyunu sonda İrəvan üçün çətin nəticələr doğura bilər.
