Gələn il Ermənistanda parlament seçkiləri keçiriləcək. Hazırda ölkədə siyasi vəziyyət olduqca qarışıqdır. Xüsusilə də, son zamanlar baş verənlər diqqəti çəkir. Belə ki, Ermənistanda "Ana Ermənistan" müxalifət blokunun 12 tərəfdarı saxlanılıb. Bununla yanaşı iki deputatın-Ovik Ağazaryan və "Mənim şərəfim var" müxalifət fraksiyasından olan deputat Taron Markaryanın toxunulmazlığı ləğv edilib.
Ermənistan parlamentinin deputatları öz həmkarları barədə cinayət işinə başlanılması ilə əlaqədar səs veriblər. Bütün bunların seçkiöncəsi atılan addımlar ola biləcəyi istisna deyil.
Modern.az-a açıqlamasında siyasi şərhçi Elşad Mirbəşiroğlu bildirib ki, siyasi oponentlərinə qarşı sərt addımlar Ermənistan baş naziri Nikol Paşinyanın dəsti-xəttidir:
"2026-cı ildə Ermənistanda parlament seçkiləri gözlənilir. Ümumiyyətlə, bu, Paşinyanın dəsti-xəttidir. Paşinyan 2018-ci ildə hakimiyyətə gəldikdən sonra siyasi oponentlərinə qarşı kifayət qədər sərt davranışları ilə diqqəti cəlb edirdi, hətta məhkəmə sistemini də özünün maraqlarına uyğun formalaşdırdı. Ayrıca olaraq da hazırda Ermənistanda siyasi mühit kifayət qədər qarışıqdır. Bunu şərtləndirən başlıca məqam 2020-ci ildə Azərbaycanın öz tarixi torpaqlarını Ermənistanın işğalından azad etməsi oldu. Yəni müxalifət Paşinyanı müharibədə məğlubiyyətdə ittiham edir. Bu gün də eyni yanaşma davam edir. 2020-ci ildə paşinyan ağır məğlubiyyətə uğradıqdan sonra bilirdi ki, bundan müxalifləri ona qarşı istifadə edəcəklər. Buna görə də 2021-ci ildə növbədənkənar seçkilərə getməklə bir növ özünün siyasi reabilitasiyasını təmin edə bildi. Sözsüz ki,bu, Paşinyanın iradəsi deyildi. Ermənistanda məlum olduğu kimi Qərbin təmsilçiliyi mövcuddur. Onlar da Paşinyana çox yaxından siyasi dəstək olmaqdadırlar".
Siyasi şərhçi vurğulayıb ki, hazırda atılan addımlar tərəflərin elektorat bazasının genişləndirməyə yönəlib:
"İndiki şəraitdə də Ermənistan müxalifəti tərəfindən Azərbaycana qarşı revanşist fikirlər səsləndirilməkdədir. Sözsüz ki, Paşinyanın ətrafı da bu cür revanşist mövqedən çıxış edirlər. Burada hər iki tərəfin də məqsədi özlərinin elektorat bazasının genişləndirilməsinə hesablanıb. Paşinyan çox gözəl dərk edir ki, Azərbaycana qarşı çıxa bilməz. Belə bir addımın atılması, Ermənistan üçün sözün əsl mənasında ölümcül olacaq. Açıq şəkildə heç bir halda Paşinyan və onun ətrafı revanş etmək niyyətində deyillər, çünki qorxurlar. Amma bütün hallarda revanşizm əhval-ruhiyyəsini də zaman-zaman nümayiş etdirirlər. Bu da gələcək elektoral prosesə hesablanıb.Yəni kütlənin dəstəyini qazanmağa çalışırlar. Bu baxımdan da Paşinyan öz siyasi oponentlərinə qarşı açıq mübarizəyə də başlayıb".
E.Mirbəşiroğlu söyləyib ki, bu, Ermənistanda 2026-cı ildə keçiriləcək parlament seçkilərinin həddindən artıq gərgin olacağını göstərir:
"Çünki Ermənistandakı mövcud vəziyyət, Paşinyanın openentlərinin yanaşmaları, çağırışları aydın göstərir ki,2026-cı ildə Paşinayna qarşı ciddi çıxamaq istəyirlər və onun hakimiyyətdən getməsi üçün əllərindən gələni edəcəklər. Paşinyan da bunu çox yaxşı anlayır və sözsüz ki, indidən qarşı cəbhəni zəiflətməyə çalışır. Hesab edirəm ki, paşinyanın oponentləri ona qarşı çox ciddi tədbirlər görməyi plnlaşdırırlar və nəticələrə də nail ola bilərlər. Yəni ki, Paşinyanın hakimiyyətdən getməsi üçün əllərindən gələni edəcəklər. Paşinyan da bununla bağlı artıq təsəvvürlərə malikdir".
