Azərbaycan Prezidenti İlham Əliyev aprelin 9-da ADA Universitetində "Yeni dünya nizamına doğru" mövzusundakı beynəlxalq forumda sualları cavablandırarkən İsrail və Türkiyə münasibətlərinin normallaşdırılmasında Azərbaycanın rol oynadağını söyləyib. 

“Mən sizi əmin edə bilərəm ki, yardım etməyə çalışmaq üçün səy göstəririk”,- o deyib.  

Modern.az-a açıqlamasında Milli Məclisin deputatı Rizvan Nəbiyev bildirib ki, İsrail Azərbaycana dost ölkədir və bu bizim üçün faydalıdır:

"Azərbaycan Respublikasının Prezidenti cənab İlham Əliyev ADA Universitetində keçirilən siyasi forumda  Türkiyə-İsrail münasibətlərinin normallaşmasında Azərbaycanın vasitəçiliyindən danışıb, iki ölkə arasındakı əlaqələrlə bağlı fikirlərini açıqladı. Prezident ilk dəfə geniş ictimaiyyətə məlum olmayan müəyyən məsələlərdən danışdı. İsrail Azərbaycana dost dövlətdir. Bu dostluq çətin zamanlarda hər iki dövlət üçün sınaqdan keçib. Siyasi liderlər arasında etibarlı siyasi münasibətlər var. Etibarlı münasibətin yaranmasının əsas səbəblərindən biri uzun əsrlərdən bəri Azərbaycanda olan yəhudi icmasına tolerant münasibətdən irəli gəlir. Bu yaxınlarda ölkəmizə səfər edən Almaniya Prezidenti Frank-Valter Ştaynmayerin nümayəndə heyətinin tərkibində olan bundestaq üzvü, hazırda AŞPA-nın vitse-prezidentlərindən olan Armin Laşet də diqqət çəkmişdi. 

“Azərbaycanda yəhudilər, xristianlar və müsəlmanların heyranlıq doğuran birgə həyatı mövcuddur. Əksəriyyəti şiə müsəlmanları olan ölkədə hətta 7 oktyabr hadisələrindən sonra belə hər hansı antisemit insident qeydə alınmayıb”,- deyə o qeyd edib.

Hazırda İsraillə Azərbaycan arasında enerji-iqtisadi sahəsində əməkdaşlıq özünü göstərir. Bu isə Azərbaycan Dövlət Neft Şirkətinin İsrailin enerji resurslarının istehsalı məsələsinə cəlb olunmasıdır. Nəzərə alsaq ki, enerji təhlükəsizliyi hər bir ölkənin milli təhlükəsizliyinin vacib komponentidir, bu da öz növbəsində, SOCAR-la İsrail şirkətləri arasında əməkdaşlığın başladılması dövlətimizlə belə strateji məsələdə əməkdaşlığa verilən dəyəri göstərir. Bu, təkcə iqtisadi-enerji əməkdaşlığı deyil, eyni zamanda enerji-siyasi əlaqələri şərtləndirən başlıca faktordur. Türkiyə ilə münasibətləri isə geniş izah etməyə ehtiyac yoxdur. Cənab Prezident bildirdi ki, Türkiyə qardaş ölkədir, strateji müttəfiqdir".

R.Nəbiyev vurğulayıb ki, Azərbaycan siyasi məkan olaraq diplomatik düyünlərin açılması üçün gündəmə gəlir:

"İsrail-Türkiyə münasibətlərində olan bu soyuqluq, gərginlik Azərbaycan tərəfini təbii ki, narahat edirdi. Ona görə də, vasitəçilik missiyası ortaya qoyulmuşdu. Birinci böhran əsasən Azərbaycanın vasitəçiliyi hesabına aradan qaldırıldı. Hazırda da Azərbaycanın vasitəçiliyi davam edir. Türkiyə ilə Azərbaycan arasında Suriyada münaqişənin olmaması istiqamətində görüşlər Bakıda aparılıb. Bu barədə İsrail və Türkiyə mətbuatında da  məlumatlar gedib. İsrail Baş nazirinin təşəkkürü də yayımlanıb. Azərbaycan siyasi məkan olaraq diplomatik düyünlərin açılması üçün gündəmə gəlir. Bunun kökündə hər iki dövlətin Azərbaycana, onun siyasi liderinə etimadı dayanır. Eyni zamanda Azərbaycanın vasitəçilik missiyası ilə qarşıya qoyulan məqsədə nail olmaq gücü, qabiliyyəti ön mövqedə dayanır. Azərbaycanın lideri dünyada davamlı olaraq nüfuzu artan azsaylı liderlərdəndir ki, onun əl qoyduğu, nəzarəti altında başlanılan missiya həmişə nəticəyönümlü olub. Bu gün də müxtəlif siyasi dairələr tərəfindən yüksək qiymətləndirilir və bizim vasitəçilik missiyasımıza müraciət olunur. Azərbaycan tərəfi də malik olduğu resurslardan istifadə etməklə həmin vasitəçilik missiyasını ortaya qoyur. Bu, həmin ölkələrin, eləcə də bizim marağımızdadır. Eləcə də bu, ümumi dostluğa, inkişafa xidmət edir".

Deputat əlavə edib ki, ABŞ Prezidenti Donald Tramp Azərbaycan Respublikası Prezidentinə ünvanladığı məktubda da Azərbaycanın ABŞ-nin tərəfdaşı İsrail ilə dostluq münasibətlərini yüksək dəyərləndirməsi də gələcəkdə bu üçlü formatda əməkdaşlıq perspektivlərindən xəbər verir:

"Ölkələrimiz birgə işləmək sahəsində zəngin tarixə malikdir və mən qarşıdan gələn illərdə əldə edə biləcəyimiz möhtəşəm məqamları səbirsizliklə gözləyirəm. Azərbaycanın tərəfdaşımız İsrailə dəstəyini və onunla dostluğunu dəyərləndirir, ölkənizin və Ermənistanın regiona sülh gətirmək üçün atdığı addımları alqışlayıram."