Suriyada ötən il 50 illik Bəəs rejimi devrilib. Bundan sonra Azərbaycanla Suriyanın keçid hökuməti arasında münasibətlər normallaşmağa başlayıb. Azərbaycanın Suriyadakı səfirliyi də artıq fəaliyyətini bərpa edib. Suriyanın keçid hökumətinin rəhbəri Əhməd Əş Şaara bu yaxınlarda Prezident İlham Əliyevlə görüşüb.
Lakin hələ də Suriyanın ölkəmizdəki səfirliyi fəaliyyətini bərpa etməyib.
Modern.az-a açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin üzvü Elçin Mirzəbəyli bildirib ki, Suriyanın Azərbaycandakı səfirliyinin fəaliyyətinin bərpası üçan təbii ki, zaman lazımdır:
“Hökumət yeni formalaşıb. Ölkə faktiki olaraq dağılmış vəziyyətdədir. İnfrastruktura böyük ziyan dəyib. Ölkənin yenidən normal məcraya qayıtması, büdcəsinin formalaşması üçün zaman lazımdır. Zənnimcə, Suriya bu mərhələni keçdikcə, təkcə Azərbaycanda deyil, digər ölkələrdəki səfirlikləri də fəaliyyətini bərpa edəcək. İndiki halda Suriyanın Azərbaycandakı səfirliyinin fəaliyyətinin bərpa olunmamasını bilavasitə bununla əlaqələndirirəm. Digər mühüm faktor da mütəxəssislərlə, diplomatlarla bağlı məsələlərdir. Bəlli olduğu kimi Suriya Xarici İşlər Nazirliyində çalışan və Suriyanın başqa ölkələrdəki səfirliyində fəaliyyət göstərən diplomatlar bilavasitə Əsəd rejimi ilə bağlı olan şəxslər olublar. Yeni diplomatik korpusun formalaşması üçün də zənnimcə zamana ehtiyac var. Əsəd rejimi ilə birbaşa işbirliyində olan insanlara yenidən Suriya üçün əhəmiyyət kəsb edən ölkələrdə Suriyanı təmsil etməsinə etimad göstəriləcəyinə inanmıram.
Diplomatik korpusun formalaşması, yeni insanların gəlməsi, ölkənin xarici siyasəti ilə bağlı konturları da bəlli deyil. Suriya hazırda oturuşmuş dövlət deyil ki, bu məsələlər haqda danışmaq mümkün olsun”.
Deputat vurğulayıb ki, Suriya diplomatik korpusunun formalaşması prosesinə də Azərbaycan töhfə verə bilər:
“Azərbaycanda diplomatiya sahəsində çox uğurlu təhsil verən ADA Universiteti var. Suriyalı mütəxəssislərin və yaxud Suriya hökumətinin etimad göstərdiyi şəxslərin bu universitet də təhsil alması qənaətimə görə mümkündür. Bütün bu problemlərin həlli üçün zamana ehtiyac var”.
