Ermənistanda növbəti dəfə Baş nazir Nİkkol Paşinyanın impiçment prosesinə başlanılması ilə bağlı məsələ gündəmə gətirilib. Müxalifyönlü erməni fəalları birləşdirən “Oyan” hərəkatı parlamentin bütün deputatlarına 10 gün ərzində prosesə başlamaq üçün fərdi məktublarla müraciət edib. 

Qeyd edək ki, bundan əvvəl də müxalifət dəfələrlə Paşinyana etimadsızlıq məsələsini gündəmə gətirib, lakin heç nəyə nail ola bilməyib.

Modern.az-a açıqlamasında sabiq xarici işlər naziri Tofiq Zülfüqarov Ermənistan Baş nazirinə qarşı atılan addımı gələcək davanın birinci mərhələsi adlandırıb:

“Nəsə demək çətindir. Amma hələlik impiçmentin baş tutması üçün əsaslar görmürəm. Gələn il keçiriləcək parlament seçkilərinə yaxınlaşdıqca, qarşıdurma daha da kəskin forma ala bilər. İmpiçment hələlik mübarizənin konstitusiyon formasıdır. Ancaq mübarizənin sona qədər konstitusyon müstəvidə aparılacağı, doğrusu, inandırıcı deyil. Yəni daha kəskin mübarizə üsullarına əl atılması istisna deyil. Ona görə bu, hələlik gələcək davanın birinci mərhələsidir”.

Sabiq nazir Paşinyanın oponentlərinin gələcəkdə daha başqa və kəskin üsullara əl atacağını istisna etməyib:

"Ermənistanda parlament üzvlərinin güllələnməsi, hərbi çevriliş və sair mübarizə formaları görülüb. Elə Paşinyan özü qeyri-konstitusiyon formada hakimiyyətə gəlib. Yəni müxtəlif kəskin mübarizə üsullarına əl atıla bilər. Ermənistanın siyasi mühitində istənilən mübarizə formasını görə bilərik".

T.Zülfüqarov baş verənləri Paşinyana qarşı hücumların birinci mərhələsi adlandırıb:

"Buna görə də hesab edirəm ki, Paşinyanın bu hücumlara tab gətirməsi mümkündür".