Aprelin 28-də İran Prezidenti Məsud Pezeşkian 120 nəfərlik nümayəndə heyəti ilə Azərbaycana səfər edib. O burada dövlət başçısı İlham Əliyevlə məhdud və geniş tərkibdə görüşüb, Heydər Əliyev Mərkəzində keçirilən Azərbaycan-İran biznes forumunda iştirak edib. Liderlərin görüşü olduqca səmimi keçib və bir-birlərinə "əziz qardaşım" deyə müraciət ediblər.

Qonşu dövlətlərlə münasibətlər Azərbaycanın xarici siyasətində prioritet təşkil edir. Türkiyə və Rusiya ilə müttəfiqlik, Gürcüstanla strateji tərəfdaşlıq mövcuddur. Pezeşkianın səfərindən sonra İranla əlaqələrin möhkəmlənməsi və münasibətlərin strateji tərəfdaşlıq səviyyəsinə qalxması ehtimalı yaranıb.

Mövzunu şərh edən Milli Məclisin Azərbaycan-İran Parlamentlərarası İşçi Qrupunun üzvü Aydın Mirzəzadə Modern.az-a bildirib ki, İran Prezidenti Məsud Pezeşkianın ölkəmizə səfəri Azərbaycan-İran münasibətlərində yeni mərhələnin əsasını qoyub:

"İran rəhbərinin Azərbaycanla münasibətlərə dair ciddi mesajları İranın öz şimal qonşusu ilə yaxşı münasibətlər qurmaqda maraqlı olduğunu göstərir. Azərbaycan isə həmişə İrana qarşı xoş, mehriban qonşuluq münasiəbətləri xəttindən yanaşıb. Heç zaman anti-İran kampaniyasına qoşulmamışıq. Azərbaycan ərazisindən İrana qarşı istifadəyə heç vaxt imkan verməmişik. İran bunu yaxşı bilir. Bu baxımdan bizim bu gün istəklərimiz və gələcəyə yönəlik niyyətlərimiz üst-üstə düşür".

Deputat qeyd edib ki, Azərbaycanın bir sıra ölkələrlə strateji müttəfiqlik praktikası İranla da mümkün ola bilər:

"Bizim yaxşı münasibətlərdən başqa, gələcək inkişaf variantımız yoxdur. İki ölkə rəhbərinin istəkləri üst-üstə düşürsə, bunu davam etdirmək olduqca vacibdir. İki ölkənin dostluğu, müttəfiqliyi artıq cəmiyyətlərdən gələn sosial sifarişdir. Liderlər bu gün xalqların iradəsini ifadə edərək, bir-birinə "əziz qaraşım" deyirlər. İran Prezidentinin Azərbaycana səfəri bundan sonra iki ölkə arasında münasibətlərin yüksələn xətlə inkişafına çox ciddi təkan olacaq".