Ermənistanın 2-ci prezidenti Robert Köçəryan Moskvada qısamüddətli səfərdə olub. Dünən gecə İrəvana qayıdan Köçəryan Kremldə “qulağına” deyilənlər barədə hələ ki komandasına məlumat verməyib.
İddialara görə, budəfəki mövzu baş nazir Nikol Paşinyanın impiçment məsələsi olub və yaxın günlərdə müxalifətin bəzi addımlar atacağı istisna edilmir.
Qeyd edilir ki, Moskvada Köçəryanla bu məsələ, həmçinin növbəti baş nazirin kim olması üçün namizədlərin adları müzakirə olunub. Məlumata görə, görüş və müzakirə birbaşa Kiriyenko ilə deyil, daha çox erməni məsələsində ixtisaslaşmış Kremlin digər rəsmisi ilə olub.
“Paşinyanın yerində Köçəryanın oturması üçün inqilab və ya çevriliş lazımdır”
Modern.az-a açıqlamasında politoloq Elxan Şahinoğlu Rusiya Prezidenti Vladimir Putinin Ermənistan baş naziri Nikol Paşinyanı Robert Köçəryanla əvəz etmək barədə düşünəcəyinə inanmadığını bildirib:
“Robert Köçəryan həmişə Rusiyaya arxalanıb. Onun istinad nöqtəsi hər zaman Kreml olub. Elə son açıqlamalarında da deyir ki, Paşinyan gərək Rusiyayla ittifaqı bərpa etsin, Moskvadan uzaqlaşmaq yanlış yoldur. Mən düşünmürəm ki, Kremlin sahibi Vladimir Putin Köçəryanla dostluğuna rəğmən Paşinyanı onunla əvəz etmək barədə düşünsün. Çünki Köçəryanın Ermənistan cəmiyyəti arasında reytinqi, nüfuzu yoxdur. Köçəryanı Paşinyanın yerində otuzdurmaq üçün ya inqilab, ya da çevriliş etməlisən. Seçki yolu ilə Köçəryanın hakimiyyətə gəlmə şansı çox aşağıdır. Bunu Rusiya da anlayır. Əksinə, Rusiya son vaxtlar Paşinyanla yaxınlaşmağa çalışır ki, onu Qərbdən uzaqlaşdırsın. Paşinyanın 9 may paradında iştirak etməsi bunun əlamətidir. Lavrov elə buna görə bu günlərdə Ermənistana səfər etmişdi. Paşinyan çox deyirdi ki, Kollektiv Təhlükəsizlik Müqaviləsi Təşkilatından (KTMT) çıxa bilərik. Amma o bu riskli addımı atmaqdan çəkinir”.
“Moskva Paşinyanla yola davam etmək istəyir”
Politoloq vurğulayıb ki, Rusiya müxalifətin güclü olduğunu hiss etdikdə Paşinyanı dəyişmək barədə qərar verəcək:
“Əlbəttə, Paşinyanın reytinqinin düşməsi ilə bağlı məlumatlar gəlir. Amma müxalifət də zəifdir. Müxalifətin də gücü yoxdur. Güclü bir müxalif lider ortaya çıxsaydı, Moskva onunla birbaşa təmasa keçib, ona dəstəyini artırardı. Amma indi elə bir fiqur olmadığına görə, hələ ki Moskva Paşinyanla yola davam etmək istəyir”.
