Ukraynanın Xarici Kəşfiyyat Xidmətinin Çinin sistemli şəkildə Rusiyaya hərbi məqsədli avadanlıq, barıt və xüsusi kimyəvi maddələr göndərməsi xəbəri geniş rezonans doğurub. Pekin Rusiya-Ukrayna müharibəsində tərəf tutmadığını və Rusiyaya müharibəni davam etdirmək üçün silah və hərbi texnika göndərmədiyini bir neçə dəfə bildirib. Bu barədə Çin Xarici İşlər Nazirliyinin davamlı açıqlamaları var.
Bunu Modern.az-a açıqlamasında politoloq Elxan Şahinoğlu bildirib.
"Buna baxmayaraq, Ukraynanın Xarici Kəşfiyyat Xidmətinin 20 Rusiya hərbi zavoduna Çindən ötürülən təchizatın həyata keçirildiyini təsdiqləyən məlumatlara malik olduğu açıqlanıb. Bu məlumata görə, Rusiyanın pilotsuz uçuş aparatları üçün istifadə etdiyi kritik elektronikanın 80%-i Çin mənşəlidir. Bu kifayət qədər böyük rəqəmdir.
Rusiya müharibənin əvvəlində dronları İrandan alırdı. Rusiya daha sonra İranla dron istehsal edən ortaq zavod tikdi. Hazırda Rusiya məhz həmin zavodun istehsal etdiyi dronlar vasitəsilə Ukrayna şəhərlərinə, qəsəbələrinə və kəndlərinə zərbələr endirir. Yəni belə bir təəssürat yarana bilər ki, Rusiya İran dronlarından istifadə edirsə və zavodda da dron istehsalı İran texnologiyaları əsasında həyata keçirilirsə, Rusiya nədən pilotsuz uçuş aparatları üçün istifadə etdiyi kritik elektronikanın 80 faizini Çindən almalıdır? Məsələ burasındadır ki, İran da vaxtilə dron istehsalı üçün gərəkli texnolgiyanı başqa dövlətlərdən almaq məcburiyyətində qalıb. Bu sırada Çin də ola bilərdi".
Politoloq vurğulayıb ki, Kiyevdən yayımlanan məlumatda Rusiya ilə Çin arasında 2024–2025-ci illər ərzində azı 5 hava əməkdaşlığı hadisəsi qeydə alınıb:
"Ukrayna kəşfiyyatının bildirdiyinə görə, bu təchizatlar sanksiyaları aşmaq məqsədilə vasitəçi firmalar və saxta adlarla həyata keçirilib. Çinlə Rusiya arasında bu gizli əməkdaşlıq beynəlxalq təhlükəsizlik üçün ciddi siqnal hesab olunur. Rusiyanın müharibədə işlətdiyi silah, mərmi və hərbi texnikanın sayı azaldıqca, ya bu sahədəki istehsalını artırmalı, ya da dost saydığı ölkələrdən hərbi texnika almalıdır. Rusiyanın bu məqsədlə müraciət etdiyi 3 ölkə var: İran, Şimali Koreya və Çin".
