ABŞ Prezidenti Donald Trampın rusiyalı həmkarı Vladimir Putinə xəbərdarlıq etməsi dünya mediasının diqqətini çəkib.
"Vladimir Putin dərk eləmir ki, mən olmasaydım, indiyə qədər Rusiyanın başına çoxlu pis şeylər gələ bilərdi. Mən həqiqətən çox pis şeyləri nəzərdə tuturam. O, odla oynayır!", - Tram qeyd edib.
Modern.az-ın məlumatına görə, siyasi ekspert Elxan Şahinoğlu Trampın mesajını şərh edib.
“Rusiya Prezidenti Vladimir Putin komanda üzvlərinə tapşırıb ki, ABŞ Prezidenti Donald Trampın ünvanına tənqidi fikirlər səsləndirilməsin. Halbuki, Rusiya rəsmiləri Cozef Bayden və onun administrasiya üzvlərinin ünvanlarına demədikləri qalmamışdı. Tramp Prezident seçildikdən və Putinin ünvanına xoş sözlər söylədikdən sonra Kreml sahibi və onun komanda üzvləri də ABŞ-ın ünvana xoş sözlər deməyə başladılar. Ancaq Putinin Ukraynaya qarşı müharibəni dayandırmaq istəməməsi və Kiyevin bombalanması Trampı hövsələdən çıxarıb və o, Putini sərt sözlərlə tənqid edib. Hazırda Putin Trampın sərt sözlərinə necə cavab verəcəyi üzərində düşünür. Məsələ burasındadır ki, Putin Trampı tərifdən sərt tənqidə keçmək istəmir və buna görə də o, həmişəki kimi dostu, Təhlükəsizlik Şurasının sədr müavini Dmitri Medvedevi qabağa verib”, - E.Şahinoğlu bildirib.
Politoloq xatırladıb ki, Medvedev Trampın tənqidlərinə onun adını çəkmədən “üçüncü dünya müharibəsi mümkünlüyü” hədəsi ilə cavab verib.
“Bu hədəyə ABŞ prezidenti Donald Trampın xüsusi nümayəndəsi Kit Kelloq cavab verib. O Dmitri Medvedevin Üçüncü Dünya müharibəsi təhlükəsinə dair səsləndirdiyi fikirləri yumşaq şəkildə “uğursuz” və “məsuliyyətsiz” adlandırıb. “Bu, dünya səviyyəli bir dövlətə yaraşmaz” deyən Ağ Ev rəsmisi Donald Trampın bu müharibəni dayandırmaq və insan qırğınlarına son qoymaq üçün çalışdığını xatırladıb. Yəni Ağ Ev rəsmisi demək istəyib ki, Tramp Rusiya üçün şansdır və Kreml bu şansı dəyərləndirmək əvəzinə, işğalçı müharibəni davam etdirməklə iki böyük ölkə arasında münasibətləri yenidən gərginləşdirəcək. Putin həm işğalçı müharibəni davam etdirmək, həm də Trampla dostluq etmək istəyir. İkisi bir arada mümkün deyil, Putin bunlardan birini seçməlidir”.
