Ermənistanın Baş naziri Nikol Paşinyan kilsə ilə bağlı açıqlamaları ilə gündəmdə qalmaqda davam edir. O, Erməni Apostol Kilsəsinin rəhbərliyini birbaşa hədəfə alıb. “Ana Taxt Müqəddəs Eçmiədzin açıq şəkildə izah etməlidir ki, II Qaregin subaylıq andını pozub, övladı var, ya yox? Bu məsələyə təcili aydınlıq gətirilməlidir”, - Paşinyan sosial şəbəkə hesabında yazıb.
Paşinyana yaxın media orqanları keşişləri “fırıldaqçılıqda” ittiham edir, bir sıra dini xadimlərin siyasətə qarışdığını, hətta bəzi hallarda dövlətin sabitliyini pozmağa çalışdığını bildirir. Kilsə isə Baş naziri “din xadimlərini gözdən salmaqda” və “cəmiyyətin mənəvi dayaqlarını sarsıtmaqda” suçlayıb.
Siyasi müşahidəçilərə görə, bu qarşıdurma təkcə dini və mənəvi məsələlərlə məhdudlaşmır. Ekspertlər Paşinyan və kilsə arasında qarşıdurmanın gələn il keçiriləcək parlament seçkiləri ilə əlaqələndirirlər. Belə ki, Kilsə Paşinyana müxalif olan revanşist qüvvələrlə yaxın münasibətdədir. Paşinyan isə seçki öncəsi bu düşərgəni zəiflətməyə və ictimai nüfuzlarını sarsıtmağa çalışır.
Qeyd edək ki, Ermənistankonstitusiyasında Erməni Apostol Kilsəsi xüsusi statusa malik dini qurumdur. Tarixən o, yalnız dini deyil, milli və siyasi liderlik funksiyaları da yerinə yetirib. SSRİ dağıldıqdan sonra isə kilsə yenidən cəmiyyətin mərkəzi sütunlarından biri kimi rol almağa başlayıb.
Erməni Apostol Kilsəsində və digər bir çox pravoslav ənənəli kilsələrdə ruhani olmaq istəyən şəxslər subaylıq andı içirlər, yəni cinsi münasibətdən və ailə həyatı qurmaqdan imtina edirlər. Bu addım onların dini həyatlarına tam həsr olunmaları, maddi və ailəvi məsuliyyətlərdən uzaq qalaraq xidmətlərini yalnız Tanrıya yönəltmələri məqsədi daşıyır.
Subaylıq andının pozulması, yəni ailə qurmaq və övlad sahibi olmaq kilsə qanunvericiliyinə ziddir və həmin ruhaninin rütbəsinin sual altına düşməsi ilə nəticələnə bilər. Paşinyanın II Qareginin övlad sahibi olub-olmaması ilə bağlı iddiası isə, əgər sübut olunarsa, kilsə üçün ciddi reputasiya itkisinə səbəb ola bilər.
Hələlik kilsə rəsmiləri Paşinyanın bu son açıqlamasına münasibət bildirməyib. Lakin əvvəlki gərginliklər fonunda bu ittihamın da cavabsız qalacağı gözlənilmir.
Bəzi təhlilçilər isə bu gedişatın Ermənistanda dini təsisatların siyasi sahədəki rolunun daha da azaldılmasına yönəlmiş uzunmüddətli strategiyanın tərkib hissəsi olduğunu düşünür. Digərləri isə Paşinyanın şəxsi populyarlığını qorumaq və diqqəti sosial-iqtisadi çətinliklərdən yayındırmaq üçün bu cür mübahisəli mövzuları qabartdığını deyirlər.
Beləliklə, Ermənistanda dövlətlə kilsə arasında gərgin münasibətlər yeni mərhələyə daxil olub. Paşinyanın açıq şəkildə kilsə rəhbərini hədəf alması təkcə dini deyil, həm də siyasi sarsıntılar yaradacaq. Növbəti günlərdə bu qarşıdurmanın hansı səviyyəyə çatacağını görəcəyik...
Modern Təhlil və Araşdırma Qrupu
