ABŞ prezidenti Donald Tramp Azərbaycan Prezidenti İlham Əliyevin Üçüncü Şuşa Qlobal Media Forumundakı çıxışını sosial şəbəkə hesabında paylaşıb. Bu paylaşım dünya diplomatiyasında və informasiya savaşında nadir hadisə hesab edilir. Bunu sıradan “repost” kimi dəyərləndirmək mümkün deyil. Paylaşımın çox ciddi mesajları var.
Bununla ilk növbədə Tramp Azərbaycanla müttəfiqliyə xüsusi önəm verdiyini göstərib. Paralel olaraq regionun gündəminin ABŞ üçün vacib olduğu mesajını verib.
Paylaşım eyni zamanda ABŞ-ın keçmiş administrasiyalarından fərqli olaraq Trampın Cənubi Qafqaz siyasətinə daha fərqli yanaşacağını da ehtiva edə bilər. O, həm də göstərdi ki, İlham Əliyevin mesajları regional çağırış gücünü çoxdan keçib. Azərbaycan liderinin çıxışları qlobal miqyasda maraq doğurur.
Və dünya mediasının çox vaxt görməzlikdən gəldiyi Azərbaycanın haqq səsi bu dəfə Trampın səhifəsindən yayıldı.
İlham Əliyev dünya lideridir
İlham Əliyevin dünya liderləri arasında nüfuz qazanması qlobal reytinqlərin mövzusudur. Regional analiz dairəsindən çıxıb. Onun pandemiya dövründə BMT və Qoşulmama Hərəkatı platformalarında göstərdiyi təşəbbüskarlıq, enerji siyasətində Avropanın təchizatçısına çevrilməsi, Rusiya-Ukrayna müharibəsində balanslı mövqeyi onu qlobal miqyasda ciddiyə alınan liderə çevirdi.
Xüsusilə, Qarabağ müharibəsində əldə edilən tarixi qələbə və bu qələbənin diplomatik müstəvidə də davam etdirilməsi dövlətimizin başçısının strateji baxışının sübutudur. Tramp kimi şəxslərin İlham Əliyevi izləməsi və fikirlərinə önəm verməsi isə heç təsadüfi deyil. Birmənalı olaraq İlham Əliyevin artıq beynəlxalq informasiya gündəminin mühüm fiquru olduğunu göstərir. Bəli, bu gün dünya liderləri onun dediklərini dinləyir, çünki o, Azərbaycan Prezidenti enerji, təhlükəsizlik və sülh məsələlərinin mühüm söz sahibidir.
Azərbaycanın böyüyən nüfuzunun göstəricisi
Trampın belə bir paylaşım etməsi, xüsusilə də ABŞ kimi bir qlobal hegemonun bu addımı Azərbaycanın beynəlxalq nüfuzunun yüksəldiyinin bariz göstəricisidir. Bu paylaşım Azərbaycana qarşı illərlə davam edən mediadaxili ikili standartların bir nöqtədə çat verdiyini göstərir. Trampın paylaşımı, eyni zamanda Qərbdə Azərbaycanın informasiya təbliğat gücünün artmasına dəlalət edir. Bu addım Şuşa Forumunun qlobal siyasi mesaj daşıdığını təsdiqləyir. Həmçinin ABŞ cəmiyyətinə Qarabağ reallığını göstərmək üçün unikal bir fürsətdir. Artıq Azərbaycana qarşı yaradılmış süni informasiya blokadası qırılır. Trampın jesti blokadanın sındırılmasında yeni mərhələnin başlanğıcı ola bilər.
Dünya heyrətdədir, Şuşadan çıxan səs qlobal səviyyədə eşidilir
Trampın paylaşımı qlobal mediada rezonans doğurdu. Bu hadisə göstərdi ki, Şuşa Forumunda deyilənlər artıq regionun çərçivəsindən çıxaraq dünya tribunalarına qədər yüksəlir. Bu da təsdiqləyir ki, Azərbaycan təkcə enerji daşıyıcısı olmaqla yanaşı, informasiya və ideya ixracatçısına da çevrilir. İlham Əliyevin Xankəndidə səsləndirdiyi fikirlər, xüsusilə Rusiya və İranla bağlı mesajlar, qlobal təhlükəsizlik gündəmində maraq doğurdu. Bu, Azərbaycanın informasiya savaşında hücum mövqeyinə keçdiyini göstərdi. Bəli, dünya artıq Tramp səviyyəsində Azərbaycanı izləyir, reaksiya verir, hətta paylaşır.
Bakı, Cənubi Qafqazın siyasi və informasiya paytaxtıdır
Üçüncü Şuşa Qlobal Media Forumu əslində Bakının Cənubi Qafqazda informasiya mərkəzi olmasının nəticəsidir. Təsadüfi deyil ki, regionun gələcəyi ilə bağlı bütün müzakirələr Bakıdan başlayır və Bakıda bitir. Azərbaycan mediası, Prezidentin rəhbərliyi ilə regionun informasiya axınının istiqamətini müəyyənləşdirir. Gürcüstanın susqunluğu, Ermənistanın dağınıq və inamsız informasiya siyasəti fonunda Bakı lider rolunu təkbaşına oynayır. Trampın paylaşımı da təsdiqlədi ki, Bakıdan səslənən hər bir siyasi və informasiya mesajı artıq Vaşinqtonda, Brüsseldə, Pekində dinlənilir. Bu reallıq diplomatik, iqtisadi və təhlükəsizlik müstəvisində Azərbaycanın əhəmiyyətini qat-qat artırır.
Heç bir qüvvə Azərbaycanla güc dilində danışa bilməz
Prezident İlham Əliyevin çıxışında səsləndirdiyi əsas mesajlardan biri də Azərbaycanın artıq “güc dili”nə cavab verəcək dövlət olduğudur. Bu, özünü 2020-ci il Vətən müharibəsi, 2023-cü ilin lokal antiterror tədbirləri, diplomatik müstəvidə aparılan ağır proseslər bu sözlərin arxasında dayanan gerçəkliyidir. Ermənistanı məğlub etmək bir mərhələydisə, onu masaya oturtmaq daha böyük strateji zəfərdir. Dünya anlayır ki, Azərbaycanı köhnə Qafqaz stereotipləri ilə qiymətləndirmək mümkün deyil. Nə Rusiya, nə İran, nə də Qərb gücləri Azərbaycana ultimatum dilində danışa bilir. İlham Əliyev bu tarazlığı qoruyaraq həm Qarabağı, həm də Azərbaycanın beynəlxalq nüfuzunu qorumağı bacardı.
İlham Əliyevin yaratdığı yeni reallıqlar
Prezident İlham Əliyevin siyasəti günümüzə hesablanmayıb. Gələcək əsrlərə hesablanmış strategiyadır. Onun “post-müharibə” siyasəti regionun konturlarını dəyişib. Şuşanın azadlığı ərazi bütövlüyü ilə yanaşı milli ruhun dirçəlişidir. Zəngəzur dəhlizi, TAP və TANAP layihələri, COP29-a ev sahibliyi və medianın regional mərkəzə çevrilməsi Azərbaycanın gələcəyini sığortalayan addımlardır. Onun irəli sürdüyü “ya sülh, ya məsuliyyət” tezisi beynəlxalq hüququn yeni yanaşması kimi qəbul edilir. İlham Əliyevin qurduğu bu geosiyasi konstruksiya, Azərbaycanın gələcək 1000 ilini formalaşdıracaq bir baza kimi qiymətləndirilir. O, indi strateji memardır.
Azərbaycan xalqı xoşbəxtdir, lideri güclüdür, torpağı azaddır
İlk dəfədir ki, xalq ərazi bütövlüyünü yaşamış bir dövlətin vətəndaşı olaraq sabaha ümidlə baxır. Qarabağda azan səsi, Şuşada bayraq, Laçında məktəb, Xankəndidə əsgər, və s… bu xoşbəxtliyin simvollarıdır. Bu xoşbəxtlik, milli kimliyin, milli qürurun bərpasıdır. Azərbaycan xalqı bir liderin necə həm diplomatiya, həm ordu, həm də media ilə tarix yazdığını canlı izləyir. Trampın paylaşımı bu xoşbəxtliyin dünyaya çatan səsidir. İlham Əliyevin liderliyi Azərbaycanın sabitliyinin, təhlükəsizliyinin və inkişafının təminatıdır. Xalq artıq “lider xalq üçün nə etdi?” sualını cavablandırıb, hər şeyi etdi!
Trampın jesti Azərbaycanın informasiya müharibəsindəki qələbəsinin xəbərçisidir
Xankəndidə deyilənlər Vaşinqtonda paylaşılırsa, bu, yeni dövrün başlanğıcıdır. Trampın jesti informasiya müharibəsində qazanılmış böyük bir zəfərin təsdiqidir. İlham Əliyev döyüş meydanında, diplomatiyada, informasiya meydanında da qalib gəlir. Azərbaycan istiqamət göstərir. Bu reallıq dəyişməyəcək.
Modern Təhlil və Araşdırma Qrupu
