Cənab Prezident İlham Əliyevin Sanxay Əməkdaşlıq Təşkilatının Zirvə toplantısında, həmçinin Çinin xarici hərbi müdaxilə və faşizm üzərində qələbəsinin 80 illiyi münasibətilə keçirilən təntənəli tədbirlərdə və hərbi paradda iştirak etmək üçün Çin Xalq Respublikasına səfəri, dövlətimizin başçısının dost ölkədə ən yüksək səviyyədə qarşılanması, ÇXR Sədri Si Cinpinin cənab İlham Əliyevi "mənim əziz dostum" deyərək mehribanlıqla salamlaması, aparılan danışıqların məzmunu ölkələrimiz arasındakı münasibətlərin ən yüksək, ən səmimi səviyyədə olduğunu göstərir və əlaqələrimizin artan xətlə daha yeni mərhələyə qədəm qoyduğundan xəbər verir.
Qeyd etmək yerinə düşər ki, ölkələrimiz arasında səmimi və işgüzar münasibətlərin təməli təxminən 30 il bundan əvvəl Ulu Öndər Heydər Əliyev tərəfindən qoyulmuşdur və bu münasibətlər cənab Prezident İlham Əliyevin səyləri nəticəsində strateji tərəfdaşlıq səviyyəsinə qaldırılmışdır. Ölkələrimiz bütün platformalarda ardıcıl şəkildə bir-birlərinin ərazi bütövlüyünü və suverenliyini dəstəkləmiş, separatizm meyillərinə kəskin etiraz bildirmişlər.
Azərbaycan Respublikası və ÇXR Parlamentləri arasındakı münasibətlər də yüksək əməkdaşlıq şəraitində inkişaf edir.
Dövlət, hökumət, parlamentlər arası münasibətlərlə yanaşı hər iki ölkənin iqtidar partiyaları arasındakı münasibətlər də qarşılıqlı hörmət və faydalı əməkdaşlıq müstəvisində inkişaf edir. Bu baxımdan Yeni Azərbaycan Partiyası ilə Çin Kommunist Partiyası arasında Əməkdaşlıq Memorandumunun imzalanması əlamətdar hadisə kimi xüsusi önəm daşıyır.
Ölkələrimiz arasında iqtisadiyyat, ticarət, loqistika sahəsində, habelə humanitar və mədəni əlaqələr getdikcə genişlənir və möhkəmlənir. Bu yaxınlarda ikitərəfli qaydada viza rejiminin ləğv edilməsi bu münasibətlərin daha da dərinləşməsinə təkan vermişdir.
Cənab Si Cinpinin qlobal təşəbbüsü olan "Bir kəmər-bir yol" layihəsinə Azərbaycanın da qoşulması, Qədim İpək Yolunun Orta Dəhlizinin bir şaxəsinin ölkəmiz üzərindən keçməsi, Zəngəzur dəhlizinin açılmasında Çinin maraqlı olması və prosesə dəstək verməsi və digər şərtlər ölkələrimizi bir-birinə daha da yaxınlaşdırır və əlaqələrimizin davamlı olmasına əlavə təminatlar yaradır.
Cənab Prezident İlham Əliyevlə ÇXR sədri cənab Si Cinpin arasında keçirilən görüşdə müzakirə olunan məsələlər, xüsusilə, ölkələrimiz arasında ticarət dövriyyəsinin yüksəlməsi, energetika, o cümlədən bərpaolunan enerji, rəqəmsallaşma sahələrində əməkdaşlığın daha da genişlənməsinə xidmət edəcəkdir.
Hesab edirəm ki, Azərbaycan Prezidentinin ŞƏT plyus Zirvə sammitində iştirakı və bu çərçivədə keçirdiyi görüşlər həm Azərbaycan-Çin münasibətlərinə, həm də Azərbaycanın Qlobal Cənub platformasında daha fəal iştirakına yeni töhfələr verəcəkdir.
Musa Quliyev
Milli Məclisin Əmək və sosial siyasət komitəsinin sədri
