Oksford lüğəti “reydjbeyt” (rage bait) terminini 2025-ci ilin sözü elan edib.
Modern.az xəbər verir ki, bu məlumatı Oksford Universitetinin nəşriyyat şöbəsi yayıb.
Mütəxəssislər “reydjbeyt”i diqqəti cəlb etmək və əhatə dairəsini artırmaq üçün qəsdən yaradılan təxribat xarakterli onlayn-kontent kimi müəyyən ediblər. Termin ingilis dilindəki “rage” (qəzəb) və bait (tələ, yem) sözlərindən yaranıb. Oksford dilçilərinin məlumatına görə, son 12 ayda bu sözün işlənmə tezliyi üç dəfə artıb.
Termin ilk dəfə 2002-ci ildə Usenet platformasında dərc olunan bir yazıda ortaya çıxıb. Həmin vaxt bu söz yol vermək tələbi kimi qəbul edilən faraların yanıb-sönən işıqlarına sürücünün reaksiyasını bildirirdi.
Sonralar söz internet söyüşləri kimi trend kontentlər üçün istifadə olunmağa başlayıb.
Lüğətdə qeyd olunur ki, zamanla “reydjbeyt” jurnalistlərin gündəlik dilinə daxil olub. Termin geniş yayıldığı üçün “reydjfarminq” (rage-farming) anlayışı meydana gəlib. Bu söz istifadəçilərin reaksiyalarını təxribat xarakterli materiallarla manipulyasiya etmək cəhdlərini, qəzəb, qıcıqlanma və ya müzakirə olunan mövzuya əlavə maraq yaratmağı təsvir edir.
Xatırladaq ki, 2024-cü ildə Oksford lüğəti ilin sözü kimi “brain rot” (“beyin çürüməsi”) terminini elan etmişdi. Bu termin aşağı keyfiyyətli internet kontentin intellektual qabiliyyətlərə dağıdıcı təsirini əks etdirir.
