Moldovadakı Azərbaycan diasporu Azərbaycan Xalqının Ümummilli lideri Heydər Əliyevin vəfatının 22-ci ildönümünü qeyd edib.
12 dekabr 2025-ci il tarixində Moldovadakı Azərbaycanlılar Konqresinin üzvləri, sədr Elçin Bayramovun rəhbərliyi ilə Azərbaycanın Moldova Respublikasındakı səfirliyinin əməkdaşları, birinci katib Dmitri Panin və konsul Səbinə Yolçuyeva, "Xüsusi Təyinatlıların qaziləri, Şəhid Ailələri və Veteranlar" İctimai Birliyinin sədri Bəhruz Məmmədzadə, eləcə də Azərbaycan diasporunun nümayəndələri Xaqani Kərimov, Məhəbbət İsmayılov, Fəxrəddin Əhmədov və başqaları görkəmli dövlət xadiminə ehtiramlarını bildirmək üçün səfirliyin qarşısında toplaşıblar.
Mərasim bir dəqiqəlik sükutla başlayıb, iştirakçılar Ümummilli liderin xatirəsini ehtiramla yad ediblər və onun müasir Azərbaycanın inkişafına verdiyi töhfələri xatırlayıblar.
"Xüsusi Təyinatlıların qaziləri, şəhid Ailələri və Veteranlar" İctimai Birliyinin sədri Bəhruz Məmmədzadə Heydər Əliyevin xatirəsinə həsr olunmuş çıxış edib. O, qeyd edib ki, Ümummilli liderin siyasi irsi bu gün də Azərbaycanın inkişaf istiqamətini formalaşdırmağa davam edir.
DAK sədri Elçin Bayramov da çıxış edərək, Heydər Əliyevin güclü, müstəqil və davamlı Azərbaycan dövlətinin yaradılmasındakı əsas rolunu vurğulayıb: "Hər bir Azərbaycanlı üçün Heydər Əliyev adı milli ruhun gücünə inamı və gələcək nəsillər qarşısında məsuliyyəti ifadə edir. O, tarixdə dərin iz buraxdı və bizdə Azərbaycan xalqına mənsub olmaqdan qürur hissi oyatdı".
Çıxışlardan sonra iştirakçılar Ümummilli liderin büstü önünə gül dəstələri qoyublar, minnətdarlıqlarını və hörmətlərini bildiriblər. Mərasim qrup şəkli ilə başa çatıb.
