Dekabr ayının 24-də Azərbaycan Respublikasının Prezidenti, Silahlı Qüvvələrimizin Müzəffər Ali Baş Komandanı cənab İlham Əliyevin 64 yaşı tamam olur. Bu münasibətlə Azərbaycan Ağsaqqallar Şurasının sədri, millət vəkili, professor Eldar Quliyev Şuranın çoxsaylı üzvləri adından cənab Prezidentə təbrik ünvanlayıb. Təbrikdə deyilir:
Möhtərəm cənab Prezident!
Azərbaycan Ağsaqqallar Şurasının 35 min üzvü adından Sizi – Azərbaycan Respublikasının Prezidentini, Silahlı Qüvvələrimizin Müzəffər Ali Baş Komandanını doğum gününüz münasibətilə səmimi-qəlbdən təbrik edir, Sizə möhkəm cansağlığı, uzun ömür, ailə səadəti, ali və məsuliyyətli dövlətçilik fəaliyyətinizdə davamlı uğurlar arzulayırıq! Sizin müdrik rəhbərliyiniz ilə doğma Azərbaycanımıza daim rifah, sülh, əmin-amanlıq, tərəqqi və yeni-yeni zəfərlər diləyirik!
Xalqımızın Ümummilli Lideri Heydər Əliyevin müəyyən etdiyi strateji inkişaf yolunun layiqli davamçısı kimi Sizin uzaqgörən və prinsipial fəaliyyətiniz nəticəsində Azərbaycan bu gün öz tarixinin ən qüdrətli və şərəfli mərhələsini yaşayır. Ölkəmiz dinamik inkişaf edir, beynəlxalq aləmdə nüfuzu və söz sahibliyi daha da möhkəmlənir, vətəndaşlarımızın rifah halı yüksəlir, respublikamız strateji hədəflərinə doğru inamla və ardıcıl şəkildə irəliləyir. Bu günlərdə Sizin təşəbbüsünüzlə irəli sürülmüş və Milli Məclisin qəbul etdiyi, müstəqillik dövrünün ən böyük amnistiya aktı uğurla həyata keçirdiyiniz dövlət siyasətində humanizmin, insan amilinə verilən dəyərin bariz göstəricisidir.
Silahlı Qüvvələrimizin Müzəffər Ali Baş Komandanı olaraq qətiyyətli rəhbərliyinizlə rəşadətli Azərbaycan Ordusunun işğaldan azad etdiyi Qarabağ və Şərqi Zəngəzur torpaqlarında hazırda Sizin başçılığınız altında sürətli və genişmiqyaslı bərpa-quruculuq işləri həyata keçirilir. “Böyük Qayıdış” proqramı çərçivəsində minlərlə məcburi köçkün öz doğma yurdlarına qayıdır, müasir şəhər və kəndlər salınır, sosial və istehsal infrastrukturu qurulur, Qarabağda həyat yenidən canlanır.
Antiazərbaycan qüvvələrin və bədxah dairələrin bütün məkrli cəhdlərinə baxmayaraq, Sizin müdrik və qətiyyətli siyasətiniz nəticəsində Azərbaycan beynəlxalq müstəvidə mühüm nailiyyətlər qazanmağa davam edir. Xüsusilə bu ilin avqust ayında ABŞ-yə uğurlu səfəriniz çərçivəsində keçirdiyiniz yüksək səviyyəli görüşlər, aparılan konstruktiv danışıqlar və əldə olunan mühüm razılaşmalar Azərbaycanın qlobal miqyasda etibarlı və prinsipial tərəfdaş kimi mövqeyini daha da möhkəmləndirmişdir. Türk dünyasının birliyi amalına daim sadiq qalan Azərbaycan Sizin rəhbərliyinizlə Türk Dövlətləri Təşkilatının fəaliyyətində də fəal iştirak edərək qurumun iqtisadi-siyasi əlaqələrinin inkişafına, ortaq Türk kimliyinin və Turan ruhunun gücləndirilməsinə mühüm töhfələr verir.
Əziz və çox hörmətli Prezidentimiz!
Respublikamızın 80 şəhər və rayonunda fəaliyyət göstərən Azərbaycan Ağsaqqallar Şurasının 35 mindən çox üzvü Sizin misilsiz xidmətlərinizi yüksək dəyərləndirir, Sizinlə fəxr edir və hər zaman uğurlu dövlətçilik siyasətinizə dəstək olduğunu bildirir. Bu əlamətdar gündə Sizi bir daha bütün səmimiyyətimizlə doğum gününüz, həmçinin qarşıdan gələn Dünya Azərbaycanlılarının Həmrəyliyi Günü və Yeni il münasibətilə ürəkdən təbrik edir, Sizə uzun və sağlam ömür, xoşbəxtlik, tükənməz uğurlar, Azərbaycan dövlətinin tərəqqisi və xalqımızın rifahı naminə gördüyünüz bütün işlərdə davamlı nailiyyətlər arzulayırıq!
Uca Allah Sizi, ailənizi və Azərbaycan xalqını qorusun!
Dərin hörmətlə,
Azərbaycan Ağsaqqallar Şurasının
35 min üzvü adından Şuranın sədri,
millət vəkili, professor
Eldar Quliyev
