Azərbaycanda hələ də ölkə üzrə təxminən 900 kənd qazlaşdırılmayıb.
Bu barədə Modern.az-ın sorğusuna cavab olaraq “Azəriqaz” İstehsalat Birliyindən məlumat verib.
Qurumdan bildirilib ki, qazlaşdırma prosesi mərhələli şəkildə aparılır və bəzi kəndlərin son mərhələyə saxlanmasının səbəbi iqtisadi baxımdan səmərəsizlikdir:
“Çətin relyef və infrastruktur problemləri bəzi kəndlərdə layihələrin icrasını çətinləşdirir”.
Həmçinin qeyd olunub ki, qazlaşdırma planları hər il "Azəriqaz"-ın maliyyə imkanlarına uyğun hazırlanır və müvafiq proqramlara daxil edilir. Ölkə üzrə bütün kəndlərin qazlaşdırılması nəzərdə tutulsa da, tam yekunlaşdırma tarixi müəyyən edilməyib.
Qazlaşdırılmamış kəndlərin ardıcıllığı həm çətin relyef, həm də bəzi kəndlərdə sakin sayının azlığı ilə bağlı müəyyən edilir.
Əlavə olaraq, Qazax, Kürdəmir, Hacıqabul, Füzuli, Biləsuvar, Beyləqan, Balakən, Ağstafa, Ağdam, Abşeron, Yevlax və Şirvan rayonları artıq tam qazlaşdırılmışdır. Qalan 900 kənd isə ölkənin digər rayonlarında yerləşir və qaz təchizatı mərhələli şəkildə davam etdirilir.
