2026-cı ilin iyun ayında Ermənistan parlamentinə növbəti seçkilər keçiriləcək. Seçkilərdə Rusiya faktorunun həlledici olub-olmaması məsələsi diqqətdədir.
Bu barədə Modern.az-a açıqlama verən politoloq Sahil İsgəndərov bildirib ki, İrəvanın artıq Qərbə meyillənməsi və Qərbin cəbhəsinə keçməsi, Moskva tərəfindən qıcıqla qarşılanır. Bu hal Rusiyanın Ermənistana nüfuzunu şərtləndirən mühüm amildir:
"Mən düşünürəm ki, Ermənistanla bağlı Moskvanın bu kontekstdə çox da sərt addımlar atmamasının əsas səbəbi hazırda Rusiyanın Ukrayna cəbhəsində üzləşdiyi çətinliklərdir.
Çünki Moskva Ermənistanı cəzalandırmaq planını, belə deyək, hələlik kənara çəkib. Hazırda Rusiyanın, qeyd etdiyim kimi, qarşılaşdığı daha ciddi problemlər var”.
Politoloqun fikrincə, bu o demək deyil ki, Rusiya gələn seçkilərdə Ermənistanın seçki prosesinə təsir göstərməyə cəhd etməyəcək:
"Təxminən 4–5 ay əvvəl ciddi bir məlumat sızmışdı ki, Rusiyanın keçmiş agent şəbəkəsinin rəhbəri və sabiq baş nazir Serj Sarkisyanın komandasına bağlı şəxslərin nəzarətində Rusiya Prezident Administrasiyasında xüsusi bir qrup yaradılıb. Bu qrupun məqsədi konkret olaraq Ermənistanla münasibətlərin tənzimlənməsi və Ermənistanda Rusiyanın nüfuzunun zəifləməsinin qarşısının alınmasıdır.
Yeri gəlmişkən, son vaxtlar Rusiya hökumətinin yüksək vəzifəli şəxsləri tərəfindən, xüsusən də hökumət tərəfindən Ermənistana iqtisadi əməkdaşlıq baxımından ciddi xəbərdarlıqların edilməsi də bunu təsdiqləyir.
Əlbəttə ki, Rusiya çalışacaq ki, həmin seçkilərə bu və ya digər şəkildə Ermənistandakı “5-ci kolon” vasitəsilə təsir göstərsin. Konkret olaraq, növbəti seçkilərdə özünün təsir dairəsində olan qüvvələrin — Köçəryan–Sarkisyan tandeminin partiyalarının parlamentdə yer almasına, nə qədər mümkündürsə, təmsil olunmasına çalışacaq.
Doğrudur, amma bu heç də o demək deyil ki, Rusiyanın gələcək planında məhz Köçəryanı və ya Sarkisyanı yenidən hakimiyyətdə görmək dayanır”.
Sahil İsgəndərov vurğulayıb ki, Rusiyanın xüsusi xidmət orqanlarına bağlı şəxslərin parlamentdə yer almasına çalışacağı da istisna deyil və Moskva buna ümid edir:
"Hazırda həbsdə olan, “dövlətçilik əleyhinə fəaliyyət”də ittiham edilən erməni əsilli rusiyalı sahibkar Samvel Karapetyanın və onun qardaşı oğlu Narek Karapetyanın bu proseslərdə iştirakı məsələsi də diqqət çəkir. Onların yaratdığı partiyanın məramı açıqlanarkən bildirilirdi ki, seçkilərə qoşulacaqlar və qalib gəlməyə çalışacaqlar.
Yəqin ki, heç kim üçün sirr deyil ki, Karapetyanların yaratdığı bu layihənin arxasında məhz Rusiyanın dayandığı, Moskvanın siyasi dəstəyinin olduğu çox açıq şəkildə görünür. Məncə, bu artıq heç kim üçün qaranlıq məsələ deyil".
Cavid Zahidoğlu
