Bu gün günorta saatlarına yaxın İran tərəfindən Naxçıvan istiqamətinə dronlarla hücum edilib. Hadisə nəticəsində 4 nəfər mülki şəxs yaralanıb.
Dron hücumuna Azərbaycanın Xarici İşlər və Müdafiə nazirlikləri rəsmi reaksiya veriblər.
Hadisənin maraqlı tərəfi bunun qəsdən, yoxsa təsadüfi olub-olmamasıdır.
Modern.az-a açıqlamasında politoloq Fərhad Məmmədov bildirib ki,Naxçıvan Hava Limanının vurulması təsadüfi deyil:
"Həm 12 günlük müharibə zamanı, həm də sonradan, eləcə də İranda müharibənin başlamasından bəri Azərbaycan bütün rəsmi səviyyələrdə səsləndirilən mövqeyini qoruyub saxlayıb: Azərbaycan ərazisi və hava məkanı İrana qarşı istifadə edilə bilməz!
Ali rəhbər Xameneinin ölümündən sonra Azərbaycan Prezidenti İran Prezidentinə başsağlığı verib və İranın Bakıdakı səfirliyini ziyarət edib. İran rəhbərliyi digər ölkələrdə də oxşar bir şey nümayiş etdirə bilərmi?! Və buna cavab olaraq dronlar mülki infrastruktura zərbələr endirir! Azərbaycan bir daha İran rəhbərliyinin nankorluğu ilə üzləşir. Hazırkı müharibə zamanı İran ABŞ hərbi bazalarının yerləşdiyi ölkələrə zərbələr endirir və ABŞ oradan İrana hücumlar edir. Azərbaycanda ABŞ və ya İsrail hərbi bazaları yoxdur!
Azərbaycan Xarici İşlər Nazirliyi artıq İranın Bakıdakı səfirini etiraz notası təqdim etmək və izahat tələb etmək üçün çağırıb. Lakin İran hazırda tamamilə qarışıqlıq içindədir. Zərbə endirmək qərarlarının necə və kim tərəfindən verildiyi bəlli deyil".
Politoloq Azərbaycanın Türkiyə ilə məsləhətləşmələrə başlayacağını vurğulayıb:
"Azərbaycan çox güman ki, Şuşa Bəyannaməsinə uyğun olaraq Türkiyə ilə məsləhətləşmələrə başlayacaq və yalnız öz müdafiəsi üçün tədbirlər görəcək. İran hücumları ilə üzləşən ərəb ölkələri hələ də cavab tədbirləri görməyib. Türkiyə də İran raketinin Türkiyə hava məkanında vurulmasından sonra eyni şeyi etdi. Nə qədər çətin olsa da, səbirli və sakit olmalıyıq.
Təcrübə göstərir ki, Azərbaycan hücumlara tab gətirə və lazım olduqda cavab tədbirləri görə bilir. Azərbaycan ərəb ölkəsi deyil. Milyonlarla Azərbaycan türkü İranda yaşayır və onlar artıq hökumətlərinin ABŞ-İsrail hücumlarından və çox tezliklə kürd silahlı qruplaşmalarından təhlükəsizliklərini nə dərəcədə təmin edə biləcəyini düşünürlər".
