İtaliyada 3,1 bal gücündə zəlzələ qeydə alınıb.
Modern.az xəbər verir ki, bu barədə İtaliyanın Geofizika və Vulkanologiya İnstitutu (INGV) məlumat yayıb.
Episentri Neapol şəhərinin qərbində yerləşən Kampi Fleqrey bölgəsi olan zəlzələnin ocağı 2,7 kilometr dərinlikdə yerləşib. Bölgədə müxtəlif maqnitudalı ardıcıl yeraltı təkanlar olub.
Zəlzələ Neapolun müxtəlif bölgələrində, xüsusən də binaların yuxarı mərtəbələrindəki mənzillərdə hiss olunub, əhali arasında təşviş yaradıb. Bəzi bölgələrdə məktəblərdə tədris dayandırılıb. İnsan tələfatı və dağıntı olmayıb.
Qeyd edək ki, Kampi Fleqrey şəhəri qədim vulkanik kraterlərdən ibarətdir. Bölgədə seysmik aktivlik son bir ildə, xüsusilə də ötən aylarda artıb. Sonuncu dəfə ən uzunmüddətli seysmik aktivlik isə 1980-ci illərin əvvəllərində qeydə alınıb.
