Birləşmiş Millətlər Təşkilatının Baş Assambleyası çərçivəsində İran prezidenti ilə görüşdüm.
Modern.az xəbər verir ki, bu barədə Fransa prezidenti Emmanuel Makron sosial şəbəkədə yazıb.
“İlk növbədə, mən tələbimi təkrarladım: İranda qeyri-insani şəraitdə özbaşına saxlanılan dövlət girovları Sesil Kohler, Jak Paris və Lennart Monterlos dərhal azad edilməlidir.
Bizim mövqeyimiz aydındır: İran heç vaxt nüvə silahı əldə etməməlidir. İranın nüvə öhdəliklərini yerinə yetirməməsi səbəbindən biz Almaniya və Böyük Britaniya ilə birlikdə İrana qarşı sanksiyaları yenidən tətbiq etməyə imkan verən Snapback mexanizmini işə salmaq qərarına gəldik. Mən İran prezidentinə güzəştə getməyəcəyimiz tələblərimizi bir daha açıq şəkildə bildirdim: MAQATE müfəttişlərinin İrana tam girişi, zənginləşdirilmiş material ehtiyatları ilə bağlı şəffaflıq və danışıqların dərhal bərpası.
Razılaşma mümkün olaraq qalır. İran bizim qoyduğumuz qanuni şərtləri yerinə yetirməlidir. Regional təhlükəsizlik və bütün dünyada sabitlik naminə”, – Makron yazıb.
Fransa prezidenti daha sonra Türkiyə prezidenti Ərdoğanla görüşüb.
Türkiyə mətbuatı xəbər verir ki, Ərdoğan Ankaranın Fransa ilə dialoqa böyük əhəmiyyət verdiyini və Parislə ticarət, enerji, müdafiə sənayesi də daxil olmaqla geniş sahələrdə əməkdaşlığı inkişaf etdirməyi hədəflədiyini bəyan edib.
O, Ankaranın Avropa İttifaqı ilə əlaqələrini intensivləşdirmək və inkişaf etdirmək niyyətində olduğunu vurğulayıb.
Ərdoğan qeyd edib ki, Türkiyə Rusiya ilə Ukrayna arasında ədalətli və davamlı sülhə nail olmaq üçün hər cür səy göstərir. O əlavə edib ki, Ankara nəticələrə diqqət yetirərək İstanbul danışıqları prosesini irəli aparmaq niyyətindədir.
Ərdoğan fransalı həmkarını ölkəsinin Fələstin dövlətini tanımaq qərarına görə təbrik edib. O qeyd edib ki, iki dövlət həllinə nail olmaq üçün İsrailin baş naziri Benyamin Netanyahu hökumətinə beynəlxalq təzyiqlərin artırılması nəticə verə bilər.
Tərəflər həmçinin Suriyadakı mövcud vəziyyətlə bağlı fikir mübadiləsi aparıblar.
