Əfqanıstanda iki günlük fasilədən sonra internet xidməti qismən bərpa edilib. Qlobal şəbəkə kəsilmələrini izləyən NetBlocks qeyd edir ki, yerli sakinlər arasında geniş yayılmış narazılıq fonunda giriş geri qayıtmağa başlayıb.
Modern.az xarici KİV-ə istinadən xəbər verir ki, internet bərpa edildikdən sonra insanlar bayram etmək üçün küçələrə axışıblar.
Hakimiyyətdə olan Taliban nümayəndələri fasiləni texniki problemlərlə əlaqələndiriblər. “Əl-Cəzirə”yə verdikləri rəsmi açıqlamada onlar köhnə fiber-optik kabellərin dəyişdirilməsinin lazım olduğunu iddia ediblər.
"Bizim internetə qadağa qoyduğumuz barədə iddia əsassıszdır", - Taliban rəsmiləri deyiblər
Bununla belə, BBC-nin məlumatlı mənbəsinin sözlərinə görə, xidmətin bərpası Taliban baş nazirinin xüsusi göstərişi ilə baş verib.
Bu, Talibanın sentyabrın 29-da başlayan kommunikasiya kəsintiləri ilə bağlı ilk açıq bəyanatıdır.
NetBlocks əvvəllər 43 milyon əhalisi olan ölkədə “internetin tamamilə bağlandığı”nı qeydə alıb və bu, telefon xidmətinə də təsir edib.
48 saatlıq dayanma əsas iqtisadi sektorlara ciddi təsir göstərib. Amu TV-nin məlumatına görə, Kabil hava limanı xidmət göstərilmədiyi üçün bütün reysləri ləğv etmək məcburiyyətində qalıb. Khaama Press-in məlumatına görə, yüzlərlə sərnişin Dubay hava limanında Əfqanıstana uçuşları gözləyənlər arasında qalıb. Bank sistemi və ticarət də ciddi pozulmalar yaşayıb.
BMT-nin Əfqanıstandakı missiyası Talibanı dərhal tam internetə çıxışı bərpa etməyə çağırıb və xəbərdarlıq edib ki, məhdudiyyətlər “Əfqan xalqına əhəmiyyətli zərər vura, iqtisadi sabitliyi təhdid edə və dünyanın ən pis humanitar böhranlarından birini şiddətləndirə bilər”.
