ABŞ prezidenti Donald Tramp rusiyalı həmkarı Vladimir Putinlə Ukraynadakı müharibə ilə bağlı üzbəüz danışıqlar planının təxirə salınmasından sonra “vaxtını itirmək istəmədiyini” deyib.
Modern.az xəbər verir ki, BBC News-un məlumatına görə, çərşənbə axşamı Ağ Evdə çıxış edən ABŞ prezidenti qeyd edib ki, Moskvanın hazırkı cəbhə xəttində hərbi əməliyyatları dayandırmaqdan imtina etməsi əsas maneə olaraq qalır.
Daha əvvəl Ağ Ev sözçüsü Trampın iki həftə ərzində Budapeştdə danışıqlar aparmaq planının təxirə salındığını bildirib. Bu həftə ABŞ və Rusiyanın sülh təklifləri arasında əsas fikir ayrılıqları getdikcə daha aydın görünür və bu sammit şansını aşağı salır.
Tramp və Putin sonuncu dəfə avqust ayında Alyaskada görüşüblər. Ağ Evin Tramp və Putin arasında ikinci görüş planını təxirə salmaq qərarı daha bir oxşar ssenaridən qaçmaq cəhdi kimi qiymətləndirilə bilər.
