“Hələ bir il əvvəl Ermənistanın baş nazirinin Azərbaycan prezidentinə və baş nazirinə təşəkkür etməsinin şahidi ola bilməzdik”.
Pa xəbər verir ki, bunu Ermənistanın baş naziri Nikol Paşinyan Gürcüstanda keçirilən “İpək Yolu” konfransı zamanı deyib.
O hesab edir ki, Ermənistan və Azərbaycan arasında yaradılmış sülhün institutsionallaşdırılması çox vacibdir.
Paşinyan əlavə edib ki, nəqliyyat əlaqələri qarşılıqlı fayda gətirir, lakin onlar həm də qarşılıqlı asılılığa gətirib çıxarır.
"Ölkələr bir-biri ilə əməkdaşlığa başlayanda bu, iqtisadi artıma və rifahın yaxşılaşmasına gətirib çıxarır. Və birdən-birə ölkələr başa düşürlər ki, onlar bir-birinin sabitliyində, ərazi bütövlüyündə, suverenliyində və ölkələrin öz qərarlarını qəbul etmək imkanlarında qarşılıqlı maraq doğurur, çünki bu, razılaşmaların əldə edilməsi və həyata keçirilməsi üçün vacibdir", - o qeyd edib.
Onun sözlərinə görə, bərqərar olmuş sülh bir əsr əvvəlki tarixə nəzər salmaq üçün gözəl imkandır.
“Tarixlərimiz bir-birinə bağlıdır. 1918-ci ildə Ermənistan, Gürcüstan və Azərbaycan bir neçə gün ərzində müstəqillik əldə etmiş, sonra həmin dövrdə onu itirmişdilər. 1991-ci ildə üç ölkə demək olar ki, eyni vaxtda müstəqillik əldə etdi. Hesab edirəm ki, 1991-ci ildə biz 1918-1920-ci il tariximizin ibrət dərslərini yetərincə öyrənə bilmədik və müstəqilliyimizi birlikdə qazanmağımızın, birlikdə itirməyimizin əsl səbəbini anlamadıq. Bunun bir səbəbi də bir-birimizin müstəqilliyinin, suverenliyinin, dövlətçiliyinin əhəmiyyətini dərk edə bilməməyimizdir. Biz və ya əcdadlarımız o zaman düşünürdük ki, bir-birimizlə vuruşmaqla böyük qazanclar əldə edə bilərik, halbuki tarix göstərdi ki, bir-birimizlə vuruşmaqla ən vacib olanı – dövlətimizi, müstəqilliyimizi itirə bilərik”.
