Ermənistanın Baş naziri Nikol Paşinyan hökumətin balansında olan bir sıra dini abidələrin, o cümlədən Ovanavank monastrının yenidən dövlətə qaytarılacağını bəyan edib.
Modern.az-ın məlumatına görə, Paşinyan parlamentdə keçirilən hökumət saatında çıxışı zamanı bildirib ki, hazırda bəzi monastr və kilsələr hökumətin balansında olsa da, onlar Ermənistan Apostol Kilsəsinə “müddətsiz və ödənişsiz istifadə üçün” verilib:
“Əgər mənim məlumatım doğrudursa, Ovanavank monastrı və bir sıra digər abidələr hökumətin balansındadır. Bu kilsələr Apostol Kilsəsinə ödənişsiz istifadəyə verilib. Lakin həmin abidələri cəmiyyətə geri qaytarmaq üçün həm mənəvi, həm də hüquqi əsaslar mövcuddur”, - deyə Paşinyan vurğulayıb.
Onun sözləri yerli televiziya kanalları vasitəsilə yayımlanıb və ölkədə geniş rezonans doğurub.
Paşinyanın bu açıqlaması fonunda Ermənistan parlamentinin spikeri Alen Simonyan da Apostol Kilsəsinin rəhbəri – bütün ermənilərin katolikosu II Qareqinə qarşı sərt bəyanatla çıxış edib.
Simonyan katolikosun qərarlarını “qanunsuz” adlandıraraq, onu andını pozmaqda ittiham edib:
“Katolikos kimdir? Mən elə bir adam tanımıram. O, öz andını pozub,” – deyə spiker bildirib.
