Qərbin vaxtında və kifayət qədər hərbi yardımı olmadan Ukraynanın müdafiə xətti yenidən ciddi təzyiq altında qala bilər.
Modern.az xəbər verir ki, bu barədə ABŞ-nın Müharibə Araşdırmaları İnstitutu (ISW) xəbərdarlıq edib.
İnstitutun son hesabatında bildirilir ki, Ukrayna ordusu Rusiya qüvvələrinin irəliləyişini dayandırmaq və cəbhəni sabitləşdirmək gücünə yalnız davamlı hərbi dəstək və mövcud sanksiyaların saxlanılması fonunda malikdir.
ISW xatırladır ki, Ukrayna ordusu 2022-ci ildə Kiyev vilayətində və ölkənin şimal bölgələrində Rusiya qoşunlarını geri çəkilməyə məcbur etmiş, həmin ilin payızında Xarkov vilayətində geniş əraziləri azad etmiş və noyabrda Xersonun sağ sahilini Rusiyanın nəzarətindən çıxarmağa nail olmuşdu.
Hesabatda qeyd olunur ki, ukraynalılar Rusiyaya “əldə etdiyi nəticələrlə müqayisədə qeyri-proporsional dərəcədə yüksək itkilər” verdirərək onu resurs və zaman itkisinə məruz qoyublar. 2024-cü ilin yazında Xarkovun şimalına, 2025-ci ilin yanvarında isə Sumı istiqamətinə Rusiya hücumları da Ukrayna tərəfindən uğurla dəf edilib.
ISW ekspertləri hesab edir ki, Ukrayna Rusiyanı mövqe savaşına məcbur edib və bu, Moskvanın genişmiqyaslı manevr imkanlarını məhdudlaşdırıb. Analitiklərə görə, Qərbin koordinasiyalı hərbi-siyasi dəstəyi davam edərsə, Ukrayna xüsusilə Donetsk bölgəsində qurduğu müdafiə xəttindən istifadə etməklə Rusiyanın irəliləyişinin qarşısını almaqda davam edə bilər.
