Ukraynanın Böyük Britaniyadakı səfiri, Silahlı Qüvvələrin keçmiş komandanı Valeri Zalujni prezident seçkiləri keçirildiyi halda Volodimir Zelenskiyə real rəqib ola bilər.
Modern.az xəbər verir ki, bu barədə "The Times" nəşri ictimai rəy sorğularına istinadən yazıb.
Nəşrin məlumatına görə, Zalujni prezidentlik reytinqində Zelenskiyə ən yaxın siyasətçi hesab edilir. O, hazırkı lideri qabaqlamasa da, “müharibə qəhrəmanı” statusu onun populyarlığını xeyli artırıb. Xüsusilə, müharibənin ilk mərhələsində müdafiəyə rəhbərlik etməsi onun ictimai dəstəyini möhkəmləndirən əsas amil kimi göstərilir.
"The Times" seçici meyllərini əks etdirən iki illik diaqrammanı da təqdim edib:
Yanvar 2024: Zelenski – 45%+, Zalujni – 30%+
Payız 2024: Zalujni Zelenskini populyarlıqda üstələyib (təxminən 30% və 20%)
Yaz 2025: Zelenski yenidən güclənib – 40%+, Zalujni – 20%
Oktyabr 2025: Fərq minimuma enib – Zelenski ~30%, Zalujni ~25%+
Bu göstəricilər Zalujnının seçkiyə qatıldığı halda ciddi rəqabət yaradacağını göstərir.
Nəşrin Zalujniyə yaxın mənbələri bildiriblər ki, populyarlığına baxmayaraq, onun prezident seçkilərinə qatılması ehtimalı azdır.
Bundan əvvəl Zalujni yazdığı məqalədə Ukraynanın “tam qələbə” əldə etməsə belə Rusiya ilə sülh saxlaya biləcəyini qeyd etmişdi:
“Sülh, hətta növbəti müharibənin gözləntisi fonunda olsa belə, siyasi dəyişikliklərə, dərin islahatlara, bərpaya, iqtisadi inkişafa və vətəndaşların geri qayıtmasına imkan yaradır.”
