Ermənistan Azərbaycanla ticarət və iqtisadi əməkdaşlığa hazırdır, bura neft məhsullarının alınması da daxil ola bilər.
Modern.az xəbər verir ki, bunu Ermənistan parlamentinin sədri Alen Simonyan jurnalistlərə bildirib.
Əvvəllər Azərbaycanın Ermənistana Gürcüstan vasitəsilə bir partiya neft məhsulları tədarük edəcəyi bildirilirdi. Tbilisi birdəfəlik rüsumsuz tranzitə razılıq verib.
Bu arada, Ermənistan parlamentinin sədri yalnız yanacağa diqqət yetirməməyə çağırıb. O, əmindir ki, alternativ enerji mənbələri nə qədər çox olarsa, Ermənistan üçün bir o qədər yaxşıdır.
Onun sözlərinə görə, İrəvan həmçinin Bakının öz mallarını Ermənistan ərazisi vasitəsilə Naxçıvan və Türkiyəyə ixrac etməsinə icazə verməlidir. Bu məsələ ilə bağlı Azərbaycanla müzakirələr davam edir və Simonyan yaxın gələcəkdə belə bir tranzitin mümkünlüyünü istisna etməyib.
Parlament sədri tərəflər arasındakı böyük etimadsızlığı uzun müddətdir sürən münaqişəni nəzərə alaraq təbii hesab edir. Lakin o düşünür ki, bu etimadsızlıq addım-addım aradan qaldırılmalıdır.
Xatırladaq ki, noyabrın əvvəlində Rusiya və Qazaxıstandan iki buğda partiyası Azərbaycan üzərindən Ermənistana çatıb. Bunlar Rusiyadan Azərbaycan vasitəsilə və ya onun ərazisindən Gürcüstana, daha sonra isə Ermənistana 35 il ərzində ilk birbaşa dəmir yolu daşımaları idi (Qazaxıstandan gələn buğda da Rusiyadan tranzitlə daşınırdı).
