ABŞ Prezidenti Donald Trump İranda etirazlara qarşı sərt tədbirlərin səngidiyi barədə ona məlumat verildiyini bildirib. Trampın sözlərinə görə, hazırda İranda kütləvi edamlarla bağlı konkret plan yoxdur.
Modern.az xəbər verir ki, o, əvvəlki sərt bəyanatlarından sonra daha ehtiyatlı mövqe nümayiş etdirərək, vəziyyəti izlədiyini deyib.
Tramp sosial şəbəkədə İranda saxlanılan bir etirazçının edam edilməyəcəyi xəbərlərinə reaksiya verərək bunu “yaxşı xəbər” adlandırıb və ümid etdiyini bildirib ki, bu tendensiya davam edəcək. Bunun fonunda neft qiymətləri geriləyib, qızıl isə rekord səviyyədən bir qədər aşağı düşüb.
İran dövlət mediası da Karəc şəhərində etirazlar zamanı saxlanılan 26 yaşlı şəxsin edam hökmü almayacağını açıqlayıb. Bildirilib ki, ona qarşı irəli sürülən “daxili təhlükəsizliyə qarşı fəaliyyət” və “rejim əleyhinə təbliğat” ittihamları ölüm cəzasını nəzərdə tutmur. Hüquq müdafiə təşkilatları isə edamla bağlı əvvəlki qərarın təxirə salındığını bildirir.
Reuters-in İrandakı mənbələrinə görə, etiraz aksiyalarının intensivliyi azalıb. Bununla belə, ölkə üzrə internetin kəsilməsi səbəbindən məlumat axını ciddi şəkildə məhdudlaşıb. İran Prezidenti Məsud Pezeşkian hökumətin iqtisadi problemlərin həlli, korrupsiya ilə mübarizə və valyuta bazarındakı vəziyyətin yaxşılaşdırılması üzərində işlədiyini bildirib.
Vaşinqton Tehrana təzyiqi artırıb. ABŞ beş iranlı rəsmiyə qarşı yeni sanksiyalar tətbiq edib. ABŞ Maliyyə Nazirliyinin açıqlamasında bu şəxslərin etirazların zorakılıqla yatırılmasına görə məsuliyyət daşıdığı vurğulanır. Sanksiyalar həmçinin saxlanılan qadınlara qarşı qeyri-insani rəftar iddiaları ilə gündəmə gələn Fərdis həbsxanasını da əhatə edir. “Böyük yeddilik” – G7 ölkələri də İran zorakılığı davam etdirərsə, əlavə məhdudiyyətlər tətbiq etməyə hazır olduqlarını bildiriblər.
Tramp eyni zamanda İran daxilində müxalifətin real dəstək potensialı ilə bağlı qeyri-müəyyən danışıb. O, İran şahının oğlu Rza Pəhləvinin ölkə daxilində kifayət qədər dəstək toplaya biləcəyinə əmin olmadığını deyib və əlavə edib ki, “istənilən rejim çökə bilər”.
