Rəsmi Vaşinqton ABŞ qoşunlarının Suriyadan tamamilə çıxarılması ehtimalını nəzərdən keçirir.
Modern.az xəbər verir ki, bu barədə Wall Street Journal qəzeti məlumat yayıb.
“Suriya prezidenti Əhməd əl-Şaraa ABŞ tərəfindən dəstəklənən kürd milislərini ölkənin şimal-şərqinə nəzarətdən məhrum etmək üçün addımlar atdığına görə Vaşinqton ABŞ qoşunlarının Suriyadan tamamilə çıxarılması ehtimalını nəzərdən keçirir”, - qəzetə adları açıqlanmayan ABŞ rəsmiləri bildiriblər.
Bu addım 2014-cü ildə başlayan ABŞ-ın Suriyadakı əməliyyatına son qoyacaq.
Qəzetin məlumatına görə, Suriyanın şimal-şərqindəki müxtəlif obyektlərə səpələnmiş təxminən 1000 ABŞ əsgəri var. Bildirilir ki, “Suriya Demokratik Qüvvələri” (PKK terror təşkilatının uzantısı-red.) tamamilə ləğv edilərsə, ABŞ rəsmiləri ABŞ qoşunlarını Suriyada saxlamaq üçün heç bir səbəb görmür.
