Böyük Britaniya, Fransa, Almaniya, İsveç və Niderland rusiyalı müxalifətçi Aleksey Navalnının iki il əvvəl Arktikadakı cəza koloniyasında zəhərləndiyinə əmin olduqlarını bildiriblər.
Modern.az-ın məlumatına görə, beş ölkənin birgə bəyanatında qeyd olunub ki, Navalnının cəsədindən götürülən nümunələrin analizləri onun orqanizmində Cənubi Amerikada zəhərli qurbağalarda rast gəlinən epibatidin maddəsinin aşkarlandığını “qəti şəkildə” təsdiqləyib. Bildirilib ki, bu toksin Rusiyada təbii şəkildə mövcud deyil.
Bəyanata əsasən, məsələ Kimyəvi Silahların Qadağan Edilməsi Təşkilatına təqdim olunub. Sənəddə Rusiyanın Kimyəvi Silahlar Konvensiyasını və Bioloji və Toksin Silahları Konvensiyasını pozduğu qeyd edilir və Moskvanın məsuliyyətə cəlb olunmalı olduğu vurğulanır. Həmçinin Rusiyanın bütün kimyəvi silah ehtiyatlarını məhv etmədiyi ilə bağlı narahatlıq ifadə olunub.
Navalnı 2024-cü ilin fevralında Arktikadakı həbsxanada vəfat etmişdi. O, ekstremizm və digər ittihamlarla məhkum olunmuşdu, lakin ittihamları rədd edirdi. Onun komandası və həyat yoldaşı Yuliya Navalnaya Rusiya Prezidenti Vladimir Putini qətli sifariş verməkdə ittiham edib. Rusiya hökuməti isə Navalnının ölümündə hər hansı məsuliyyəti dəfələrlə inkar edib.
Britaniyanın xarici işlər naziri Yvette Kuper Münhen Təhlükəsizlik Konfransında Navalnının dul xanımı ilə görüşdükdən sonra açıqlamasında bildirib ki, əldə olunan nəticələr “Kremlin onu susdurmaq planını üzə çıxarır”.
