Rusiyada xiyarın qiymətinin kəskin bahalaşması ictimai narazılığa səbəb olub.
Rəsmi statistikaya görə, dekabrdan bəri xiyarın qiyməti iki dəfə artaraq kiloqramı orta hesabla 300 rubldan (təxminən 3,9 dollar) yuxarı qalxıb. Sosial şəbəkələrdə isə bəzi yerlərdə qiymətin bundan iki-üç dəfə baha olduğu bildirilir.
Modern.az-ın məlumatına görə, bahalaşma siyasətçilərin də reaksiyasına səbəb olub.
Parlamentdə təmsil olunan “Ədalətli Rusiya” partiyasının lideri Sergei Mironov qiymət artımını tənqid edərək, Kənd Təsərrüfatı Nazirliyinin bunu mövsümi amillərlə izah etməsini inandırıcı saymadığını bildirib. Onun sözlərinə görə, ötən il də kartofun bahalaşması eyni arqumentlə əsaslandırılmışdı.
Hakim Vahid Rusiya partiyasından olan deputat Yevgeny Popov isə sosial mediada qiymətlərin tezliklə enəcəyini və Rusiyanın bu məhsul üzrə özünü tam təmin etdiyini yazıb. Lakin istifadəçilər bu fikirlərə etiraz edərək xiyar və pomidorun qiymətlərini “qızıl” adlandırıblar.
Məsələ ilə bağlı antiinhisar qurumu istehsalçı və pərakəndə satış şəbəkələrinə müraciət edərək qiymət artımının səbəblərini izah etməyi tələb edib. Bahalaşma ilin əvvəlindən ümumi qiymət artımının 2,1 faiz təşkil etdiyi və inflyasiyanın 5,5 faizə çata biləcəyi proqnozları fonunda baş verir.
İstehsalçılar havaların isinməsi ilə gələn ay qiymətlərin sabitləşəcəyini bildirirlər. Bununla belə, artım dörd ildir davam edən Ukrayna müharibəsi fonunda zəifləyən iqtisadiyyat və artan yaşayış xərcləri ilə bağlı narahatlıqları daha da gücləndirib.
