“İran artıq Avropanı və xaricdəki Amerika hərbi bazalarını təhdid edə biləcək raketlər hazırlayıb və hazırda ABŞ-a çata biləcək raketlər üzərində işləyir”.
Modern.az xəbər verir ki, bunu ABŞ Prezidenti Donald Tramp Konqresə ünvanladığı müraciətdə bildirib.
O, vəziyyəti diplomatik yolla həll etmək istəyini vurğulayıb.
"Onlar [İran] razılaşma istəyirlər, amma "bizim heç vaxt nüvə silahımız olmayacaq" sözlərini eşitməmişik. Bir şeyə əminəm: Mən heç vaxt dünyanın aparıcı terror sponsorunun nüvə silahı əldə etməsinə icazə verməyəcəyəm. Mən buna icazə verə bilmərəm", - deyə ABŞ Prezidenti vurğulayıb.
İran sərhədlərindən kontinental Amerika Birləşmiş Ştatlarına ən qısa məsafə 9400 kilometr (5800 mil) məsafədir.
ABŞ bir müddətdir İran sahilləri yaxınlığında əhəmiyyətli qüvvələr toplayır və o cümlədən Yaxın Şərqdəki bazalarındakı qoşunlarını bura yönəldir. Bu fonda Tehran və Vaşinqton İranın nüvə proqramı ilə bağlı danışıqlar aparırlar.
Trampın xüsusi nümayəndəsi Stiv Uitkoff danışıqlar çərçivəsində yeni görüşünün 26 fevralda Cenevrədə keçiriləcəyini açıqlayıb.
Tramp Tehranı razılığa gəlməyə məcbur etmək üçün İrana qarşı məhdud hücumu nəzərdən keçirdiyini bildirib. Bir gün əvvəl ABŞ prezidenti Tehran razılığa gəlməsə, İranı "çox pis gün" ilə hədələmişdi. 19 fevralda o, dünyanın İranın gələcəyini 10 gün ərzində öyrənəcəyini bildirib.
