İran prezidenti Məsud Pezeşkian Ayətullah Seyid Müctəba Xameneini Ekspertlər Şurasının qərarı ilə Ali Lider seçilməsi münasibətilə təbrik edib.
Modern.az saytı “Mehr” Agentliyinə istinadən xəbər verir ki, M.Pezeşkian bununla bağlı Müctəba Xameneiyə mesaj ünvanlayıb.
O bildirib ki, bu seçkilər İran xalqı üçün şərəf, güc və tərəqqi dövrünün başlanğıcını xəbər verir.
Pezeşkian qeyd edib ki, Ekspertlər Şurasının qərarı İslam Respublikasının idarəetmə strukturunun davamlılığını və ölkənin sabitliyini gücləndirən mühüm addımdır.
Prezident həmçinin milli birlik və həmrəyliyin gücləndirilməsinin İranın üzləşdiyi çətinliklərin öhdəsindən gəlməkdə həlledici rol oynayacağını vurğulayıb. Onun fikrincə, İran keçmişdə olduğu kimi, xalqının dözümlülüyü, sağlam düşüncəsi və həmrəyliyi sayəsində bugünkü çətinliklərin də öhdəsindən gələcək.
Pezeşkian mesajında Müctəba Xameneiyə nizam-intizam işlərində uğurlar arzulayıb və ölkənin müstəqilliyi, tərəqqisi və çiçəklənməsi naminə birlikdə çalışmağa davam edəcəklərini bildirib.
İranın 57 yaşlı yeni Ali Rəhbəri Müctəba Xamenei mərhum Ayətullah Əli Xameneinin oğludur.
İranı 37 il idarə etmiş Əli Xamenei 28 fevralda ABŞ-İsrail hava hücumunda öldürülüb.
