Son beş ildə Avropa ölkələri dünyada ən böyük silah idxalçısına çevrilib.
Modern.az-ın məlumatına görə, bu barədə Stokholm Beynəlxalq Sülh Araşdırmaları İnstitutunun (SIPRI) yeni hesabatında bildirilir.
Məlumata görə, 2021–2025-ci illərdə Avropa ölkələrinin silah idxalı 2016–2020-ci illərlə müqayisədə üç dəfədən çox artıb. Artım əsasən Rusiyanın Ukraynaya qarşı müharibəsindən sonra Avropa dövlətlərinin təhlükəsizlik narahatlıqları və öz ordularını gücləndirməsi ilə bağlıdır. Bu dövrdə Avropa ölkələri həm Ukraynanın müdafiəsini dəstəkləmək, həm də illərlə yetərincə maliyyələşdirilməyən ordularını yenidən qurmaq üçün silah alışını artırıblar.
SIPRI-nin məlumatına görə, hazırda qlobal silah idxalının 33 faizi Avropanın payına düşür. Əvvəlki beşillik dövrdə bu göstərici cəmi 12 faiz idi. Avropaya silah axınının kəskin artması nəticəsində dünya üzrə silah ticarətinin ümumi həcmi də təxminən 10 faiz yüksəlib.
Avropa ölkələri yerli istehsalı artırmağa çalışsa da, ABŞ-dan silah alışını genişləndirməyə davam edir. Xüsusilə döyüş təyyarələri və uzaqmənzilli hava hücumundan müdafiə sistemləri Avropa dövlətləri tərəfindən ən çox alınan silah növləri arasında yer alır.
Eyni zamanda, Yaxın Şərq ölkələrinin silah idxalı son beş ildə 13 faiz azalıb. Buna baxmayaraq, Səudiyyə Ərəbistanı və Qətər dünyada ən böyük silah alıcıları arasında qalır. Ekspertlər hesab edir ki, regionda artan gərginlik, xüsusilə İran ətrafında baş verən hadisələr gələcəkdə hava hücumundan müdafiə və raket əleyhinə sistemlərin alınmasını daha da artıracaq.
Silah ixracı üzrə isə ABŞ dünya bazarında mövqeyini daha da gücləndirib. Hazırda qlobal silah ixracının 42 faizi ABŞ-ın payına düşür. Fransa 9,8 faizlə ikinci yerdə qərarlaşıb. Rusiyanın payı isə Ukraynaya qarşı 2022-ci ildə başladığı müharibədən sonra 21 faizdən 6,8 faizə qədər azalıb.
Hesabata görə, Avropa ölkələrinin ümumi silah ixracı qlobal bazarın 28 faizini təşkil edir ki, bu da Rusiyanın payından dörd dəfə, Çinin payından isə təxminən beş dəfə çoxdur.
