"ABŞ ilə danışıqlar artıq gündəmimizdə deyil".
Modern.az “Mehr” Agentliyinə istinadən xəbər verir ki, bunu İranın xarici işlər naziri Abbas Əraqçi bildirib.
Əraqçi "ABŞ ilə danışıqlara hazırlıqlar və ya atəşkəs mövzusu varmı" sualına belə cavab verib:
"Əvvəla, deməliyəm ki, bu barədə danışmaq hələ tezdir. Hamımız yeni Ali Liderin açıqlamalarını və mövqeyini gözləyirik, bu açıqlamalar tezliklə veriləcək".
İran xarici işlər naziri sözünə davam edərək deyib: "Lakin düşünmürəm ki, amerikalılarla danışıqlar yenidən gündəmimizə qayıdacaq. Çünki Amerika ilə danışıqlar aparmaqda çox ağrılı təcrübəmiz var. Biz onlarla ötən ilin iyun ayında danışıqlar apardıq və onlar danışıqların ortasında bizə hücum etdilər".
“Bu il bizi bir daha inandırmağa çalışdılar, amma bu dəfə vəziyyət fərqli idi. Bizə hücum etmək niyyətində olmadıqlarını və İranın nüvə məsələsini sülh və danışıqlar yolu ilə həll etmək istədiklərini və sonda razılaşdıqlarını vəd etdilər. Lakin üç raund danışıqlardan sonra, Amerika komandası danışıqlarda əhəmiyyətli irəliləyiş əldə edildiyini söylədikdə, yenə də bizə hücum etmək qərarına gəldilər. Buna görə də, düşünmürəm ki, Amerika ilə danışıqlar artıq gündəmimizdədir”, - nazir əlavə edib.
“Hörmüz boğazından neft daşınmalarında fasilələr və pozuntular varmı” sualına Əraqçi belə cavab verib:
“Bu, bizim günahımız deyil və planımızın bir hissəsi deyildi. Neft istehsalının və ya daşınmasının azalması və ya dayandırılması bizim hərəkətlərimizdən deyil, İsrail və Amerikanın İrana qarşı həyata keçirdiyi hücumlardan qaynaqlanır. Onlar bütün bölgəni təhlükəsiz olmayan hala gətiriblər. Buna görə də neft tankerləri və gəmiləri Hörmüz boğazından keçməkdən qorxurlar”.
İran xarici işlər naziri bildirib ki, İran Hörmüz boğazını bağlamayıb və gəmilərin keçidinə mane olmayıb:
“Lakin Amerika və İsrailin hücumları bütün regionu təhlükəsiz vəziyyətə salıb. Bu vəziyyətin nəticələri çox böyükdür; təkcə bizim üçün deyil, bütün region və beynəlxalq ictimaiyyət üçün"
Neft tədarükünün məhdudlaşdırılmasının onların strategiyasının bir hissəsi olub-olmadığı soruşulduqda, Əraqçi belə cavab verib: "Əslində, bu, bizə qarşı tətbiq edilən müharibədir. Etdiyimiz şey sırf müdafiə xarakterlidir. Biz tamamilə qanunsuz təcavüz aktı ilə üzləşirik və hərəkətimiz qanuni müdafiədir”.
Əraqçi əlavə edib: "Biz əvvəllər regiondakı bütün ölkələri xəbərdar etmişdik; əgər Amerika bizə hücum edərsə, Amerika ərazisinə çıxışımız olmadığı üçün regiondakı Amerika bazalarını, obyektlərini və aktivlərini hədəf alacağıq. Nəticədə müharibə bütün regiona yayılacaq. Bu, Amerikanın bizə hücum etməsinin nəticəsidir və biz buna görə məsuliyyət daşımırıq"
