Velosiped daşımaq üçün klassik baqaj sistemlərinə alternativ olaraq yeni texnologiya təqdim olunub.
Modern.az xəbər verir ki, bu barədə “The Verge” məlumat yayıb.
ABŞ-nin "Allen Sports" şirkəti avtomobilin üzərinə vantuz vasitəsilə yapışdırılan və "Bluetooth" ilə izlənilən velosiped daşıyıcısı hazırlayıb. Yeni “Smart Suction Go” adlı bu sistem velosipedi avtomobilin damına və ya arxa hissəsinə vantuzlar vasitəsilə bərkidir. Sistem adi vantuzlardan fərqli olaraq ağıllı təzyiq sensorları ilə təchiz olunub. Bu sensorlar vantuzun boşalma ehtimalını hər 5 saniyədən bir yoxlayır və problem yaranarsa istifadəçinin smartfonuna bildiriş göndərir.
Şirkətin məlumatına görə, sistemdə bir neçə vantuz istifadə olunur və hətta vantuzlardan biri boşalsa belə, digərləri velosipedi yerində saxlaya bilir. İstehsalçı bildirir ki, istifadəçilərə problem yarandıqda avtomobili saxlamaq üçün bir neçə dəqiqə vaxt verilir. Bu qurğu əsasən çəkisi 15 kiloqrama (35 funt) qədər olan velosipedlər üçün nəzərdə tutulub və -15°C-dən +60°C-yə qədər temperaturda işləyə bilir. Qurğu 4 AA batareya ilə işləyir və təxminən 6–8 saat aktiv istifadə müddəti təqdim edir. Şirkət eyni texnologiyanı foto və video çəkiliş üçün kameraları avtomobilə bərkitmək üçün də istifadə etməyi planlaşdırır.
Yeni “Smart Suction Go” modelinin qiyməti 299 dollar təşkil edir.
