Ordumuzun tarixi Zəfərinin ildönümü münasibətilə Azərbaycan Mərkəzi Bankı tərəfindən tədavülə buraxılan 500 manat nominallı "Zəfər" xatirə banknotu məhdud sayda - 1 milyon ədəd istehsal olunub.
Bu barədə Modern.az-a Azərbaycan Mərkəzi Bankından (AMB) məlumat verilib.
Bildirilib ki, beynəlxalq təcrübəyə uyğun olaraq, xatirə banknotunun istehsal limitinin artırılması nəzərdə tutulmur:
"Hazırda istehsal olunmuş 500 manatlıq xatirə pul nişanlarının 22%-i tədavüldədir və bu pul nişanları digər dövriyyə pulları kimi ölkə ərazisində nominal dəyəri ilə qanuni ödəniş vasitəsidir".
Qeyd edilib ki, "Azərbaycan Respublikasının Mərkəzi Bankı haqqında Qanunu"nun 33.6-cı bəndinə əsasən Mərkəzi Bankın buraxdığı pul nişanları, o cümlədən yubiley və xatirə pul nişanları bütün ölkə ərazisində nominal dəyərləri ilə hər növ ödənişlərin həyata keçirilməsi, hesablara daxil edilməsi və pul köçürmələri zamanı hökmən qəbul edilir.
