Koroğlu Rəhimov küçəsi 49, bina 98a ünvanında yaşayan sakinlərin Modern.az saytına şikayət ünvanlandığı barədə məlumat vermişdik. Şikayətdə binada siçovulların əlindən yaşayışın mümkün olmadığı bildirilirdi. Əvvəllər məcburi köçkünlərin yaşadığı bu binada indi “Sovetski”də evləri sökülən, mənzillərinin kvadratı az olan sakinlər yerləşdirilib.
Binanın komendantı Yeganə Cəfərova əvvəlcə faktı təsdiq etsə də, hazırda heç bir problemin olmadığını demişdi.
Sakinlərin saytımıza verdiyi məlumata görə, bu günlərdə siçovullardan biri hətta, “hər şey qaydasındadır” deyən komendantı dişləyib.
Hadisə belə baş verib: binanı başına götürən siçovulları yox etmək üçün onların yuvalarına xüsusi məhvedici dərman qoyulub. Bu dərmandan yeyən siçovul qarşısına ilk çıxan şəxsi - bunanın komendatı Yeganə Cəfərovaya hücum çəkib.
Məsələni dəqiqləşdirmək üçün xanım komendantın özü əlaqə saxlasaq da, o, kobud və təhqiredici ifadələrdən istifadə edərək, telefonu söndürdü.
Xatırladaq ki, Y.Cəfərova bundan əvvəlki açıqlamasında problemlə bağlı Sanitariya və Epidemologiya Stansiyasına müraciət etdiyini bildirmişdi: “Onlar bizdən 100 manat pul istədilər. Həmçinin müqavilə bağlamaq gərəkliyini bildirdilər. Mən şəxsən möhürüm olmadığına görə müqavilə bağlaya bilmərəm.
Həm də biz “Sovetski”dən köçən adamlarıq. Bu məbləği verməyə imkanımız yoxdur”.
Y.Cəfərova problemi özünün həll etdiyini deyib: “Ona görə də şəxsən özüm dərman alıb dərmanladım. Hazırda binadakı 104 mənzildən yalnız 2-də yaşayış yoxdur. Hamısı da “Sovetski”dən gələnlərdir”.
Modern.az
