“ATƏT Dağlıq Qarabağ münaqişəsinin həlli yollarını tapmağa çalışır. Biz əlimizdən gələni edəcəyik ki, münaqişə həll olunsun”. 
 
Modern.az-ın xəbərinə görə, bunu Bakıdakı Ramana qəsəbəsində yerləşən Şuşa şəhərciyində məcburi köçkünlərlə keçirilən görüşdə ATƏT -in fəaliyyətdə olan sədri, Almaniyanın xarici işlər naziri  Frank Valter Ştaynmayer deyib. 
 
Ştaynmayer bildirib ki, aprel hadisələri zamanı bütün səylər atəşin dayandırılmasına yönəlib:

“İndi demək olar ki, atəş yoxdur. Lakin "status-kvo" belə qalmamalı, danışıqlar yolu ilə dəyişməlidir. Mən İrəvanda görüşlər keçirmişəm, Bakıda da görüşlər keçirəcəyəm.

Biz çalışmalıyıq ki, münaqişənin həll yollarını tapaq. Aprel hadisələri göstərdi ki, münaqişə çoxlu qurbanlara səbəb olur. Hər tərəf başa düşməlidir ki, münaqişə sülh yolu ilə həll olunmalıdır.
Biz addım atmasaq, qısa müddətdə ekskalasiya baş verəcək, vəziyyət gərginləşəcək. ATƏT bütün imkanlarından istifadə edəcək ki, gələcək sülhün bünövrəsi yaransın.

Əlimizdə əvvəldən müəyyən sənədlər var, biz o sənədlərin əsasında addımlar atmalıyıq. Azərbaycan və Ermənistan da  münaqişənin həlli üçün səy göstərməlidir.

Ağa AKİFOĞLU