Astanada fəaliyyət göstərən TWESCO təşkilatı Beynəlxalq Türk Akademiyası Monqolustanda arxeoloji qazıntılara başlayıb. “Şivet ulan” məqbərə kompleksində başlanan arxeoloji qazıntılar dünya türk elminə yeni sirlər açacaq. Layihəni Monqolustan Elmlər Akademiyasının Tarix və arxeologiya institutu həyata keçirir. Bununla bağlı Beynəlxalq Türk Akademiyasının 2016-cı ildə keçirdiyi “Böyük Çöl” humanitar forumunda əməkdaşlıq razılaşması imzalanıb.
Modern.az xəbər verir ki, iki ay müddətində davam edəcək qazıntıların əsas məqsədi qədim türklərin etno-mədəni və arxeoloji irsini müəyyən etməkdir.
Arxeoloji qazıntılara Monqolustan tərəfdən məşhur arxeoloq D.Çevendorj, Qazaxıstan tərəfdən isə alim-türkoloq N.Bazilxan rəhbərlik edirlər.
Qazıntılar yekunlaşandan sonra, bu il 20-25 avqust tarixlərində TWESCO “Köçərilərin Böyük Çöldəki xəzinəsi: Tyan-Şandan Öteməenə qədər” adlı beynəlxalq ekspedisiya təşkil edəcək. Ekspedisiyanın tərkibinə Azərbaycan, Qazaxıstan, Qırğızstan, Monqolustan, Rusia və Türkiyədən olan alimlər və ictimai xadimlər dəvət olunublar.
Modern.az
