Azərbaycanda dini fanatizm və dini düşmənçilik zəminində hakimiyyətin zorla ələ keçirilməsi, konstitusiya quruluşunun zorla dəyişdirilməsi və ərazi bütövlüyünün parçalanmasına xüsusi cəzalar, o cümlədən ömürlük həbs cəzası tətbiq olunur.
Milli Məclisdən verilən məlumata görə, Azərbaycan prezidentinin təqdimatı ilə bununla bağlı Cinayət Məcəlləsinə yeni 278.2 maddəsinin salınması təklif olunur.
Layihə Milli Məclisə təqdim olunub və növbəti iclasda müzakirəyə çıxarılacaq.
Milli Məclisin Hüquq siyasəti və dövlət quruculuğu komitəsinin üzvü Fəzail Ağamalı Modern.az-a açıqlamasında prezidentin təqdimatını şərh edib. O bildirib ki, bu, zamanında atılmış addımdır.
“Dünyada, dini ekstremizm geniş miqyas alıb. Müxtəlif düşüncə daşıyıcılarının ideyalar ətrafında birləşərək hakimiyyətin zorakılıqla ələ alınması tendensiyası artıq formalaşmaqdadır. Ayrı ayrı dövlətlərin konstitusion quruluşu üçün çox ciddi təhlükələr yaratmaqdadır.
Uzağa getmək lazım deyil. Türkiyədə 15 iyul hadisələri dediklərimizə çox aydın bir misaldır”
Deputat bildirib ki, ərəb ölkələrində ən müxtəlif radikal cərəyanların törətmiş olduğu terrorlar göz qabağındadır.
“Ona görə də ölkə prezidentinin atmış olduğu bu addım çox ciddi əhəmiyyət kəsb edir və qabaqlayıcı xarakter daşıyır. Dövlət başıçısının atmış olduğu bu addım, təqdim etdiyi təklif Azərbaycanda Konstitusiya quruluşunun qorunub saxlanmasına, Azərbaycanın hüquqi, dünyəvi və dövlətçiliyimizin möhkəmlənməsinə xidmət edən bir töhfədir”.
Namidə BİNGÖL